ప్రతిపక్షం, సెప్టెంబర్ 08: తెలంగాణ నుంచి ఫిలిప్పీన్స్కు బియ్యం ఎగుమతులను పెంచడంతో పాటు ఇరు ప్రాంతాల మధ్య వ్యవసాయ, వాణిజ్య సంబంధాలను మరింత విస్తరించేందుకు కీలక చర్చలు జరిగాయి. తెలంగాణ రాష్ట్ర పౌరసరఫరాల శాఖ మంత్రి ఉత్తమ్ కుమార్ రెడ్డి మంగళవారం న్యూఢిల్లీలో ఫిలిప్పీన్స్ వ్యవసాయ శాఖ కార్యదర్శి, ఆ దేశ మంత్రివర్గ సభ్యుడు ఫ్రాన్సిస్కో పి. టు లారెల్ జూనియర్తో సమావేశమయ్యారు. ఈ సందర్భంగా తెలంగాణ నుంచి బియ్యం ఎగుమతులు పెంచడం, ఇతర వ్యవసాయ ఉత్పత్తులకు అంతర్జాతీయ మార్కెట్లు కల్పించడం వంటి అంశాలపై ఇరువురు విస్తృతంగా చర్చించారు.
భారతదేశంలో అత్యధికంగా వరి పండించే రాష్ట్రాల్లో తెలంగాణ ఒకటని మంత్రి ఉత్తమ్ కుమార్ రెడ్డి వివరించారు. పెద్ద మొత్తంలో నాణ్యమైన బియ్యాన్ని ఉత్పత్తి చేసి సరఫరా చేయగల సామర్థ్యంతో పాటు ఆధునిక బియ్యం మిల్లింగ్ వ్యవస్థ, అనుభవజ్ఞులైన పరిశ్రమలు తెలంగాణలో ఉన్నాయని తెలిపారు. అంతర్జాతీయ మార్కెట్ అవసరాలకు అనుగుణంగా నాణ్యతా ప్రమాణాలను పాటిస్తూ పెద్ద మొత్తంలో బియ్యాన్ని సరఫరా చేయగల సామర్థ్యం రాష్ట్రానికి ఉందని పేర్కొన్నారు.
తెలంగాణ నుంచి బియ్యం దిగుమతి చేసుకునే ప్రతిపాదనపై ఫిలిప్పీన్స్ వ్యవసాయ శాఖ కార్యదర్శి సానుకూలంగా స్పందించినట్లు మంత్రి తెలిపారు. భవిష్యత్తులో తెలంగాణ నుంచి మరింత పెద్ద మొత్తంలో బియ్యాన్ని కొనుగోలు చేసే అవకాశాలను పరిశీలిస్తామని ఫిలిప్పీన్స్ ప్రతినిధి పేర్కొన్నట్లు చెప్పారు. ఈ ప్రక్రియను ముందుకు తీసుకెళ్లేందుకు ప్రభుత్వ సంస్థలు, గుర్తింపు పొందిన దిగుమతిదారులు, ఎగుమతిదారులు, బియ్యం మిల్లర్ల మధ్య సమన్వయం అవసరమని ఇరుపక్షాలు అభిప్రాయపడినట్లు తెలిపారు.
ఫిలిప్పీన్స్లో బియ్యం దిగుమతులకు గణనీయమైన అవసరం ఉండటం, అంతర్జాతీయంగా బియ్యం సరఫరా చేసే దేశాల సంఖ్యను విస్తరించేందుకు ఆ దేశం ప్రయత్నిస్తున్న నేపథ్యంలో ఈ చర్చలకు ప్రాధాన్యం ఏర్పడిందని ఉత్తమ్ కుమార్ రెడ్డి వివరించారు. పోటీ ధరలు, నాణ్యతలో స్థిరత్వం, నిర్ణీత సమయంలో సరఫరా చేసే సామర్థ్యం తెలంగాణకు ఉన్నాయని, అందువల్ల ఫిలిప్పీన్స్కు తెలంగాణ దీర్ఘకాలిక వాణిజ్య భాగస్వామిగా మారే అవకాశం ఉందని పేర్కొన్నారు.
సమావేశంలో బియ్యం రకాలు, ధరలు, నాణ్యతా ప్రమాణాలు, కొనుగోలు విధానాలు, రవాణా ఏర్పాట్లు, ధ్రువీకరణ ప్రక్రియలు, ఆరోగ్య, మొక్కల ఆరోగ్యానికి సంబంధించిన నిబంధనలపైనా చర్చ జరిగినట్లు మంత్రి తెలిపారు. ఎగుమతుల విషయంలో ఎదురయ్యే సాంకేతిక, నియంత్రణ అంశాలను సంబంధిత అధికారులు, పరిశ్రమ ప్రతినిధులు కలిసి పరిశీలించి, వాణిజ్య ప్రతిపాదనలను కార్యరూపంలోకి తీసుకురావడానికి స్పష్టమైన కార్యాచరణ ప్రణాళిక రూపొందించాలని నిర్ణయించినట్లు వెల్లడించారు.
బియ్యంతో పాటు తెలంగాణ నుంచి మాంస ఉత్పత్తులు, నాణ్యమైన విత్తనాలను కొనుగోలు చేసే అంశంపైనా ఫిలిప్పీన్స్ ఆసక్తి వ్యక్తం చేసినట్లు ఉత్తమ్ కుమార్ రెడ్డి తెలిపారు. దీనిని తెలంగాణ ప్రభుత్వం స్వాగతిస్తోందని చెప్పారు. విత్తనోత్పత్తి, ఆహార శుద్ధి, వ్యవసాయ అనుబంధ రంగాల్లో తెలంగాణకు ఉన్న సామర్థ్యాన్ని అంతర్జాతీయ మార్కెట్లకు పరిచయం చేయాల్సిన అవసరం ఉందని పేర్కొన్నారు.
తెలంగాణ నుంచి ఎగుమతి చేయగల ఉత్పత్తులు, వాటికి అవసరమైన నాణ్యతా ప్రమాణాలు, అనుమతులు, ఇతర నియంత్రణ నిబంధనలను ప్రభుత్వ సంస్థలు, ప్రైవేటు రంగ ప్రతినిధులతో కలిసి పరిశీలిస్తామని మంత్రి తెలిపారు. కేవలం బియ్యం ఎగుమతులకే పరిమితం కాకుండా వ్యవసాయ రంగంలోని వివిధ ఉత్పత్తులకు విదేశీ మార్కెట్లు అందుబాటులోకి తీసుకురావడమే లక్ష్యమని స్పష్టం చేశారు.
తెలంగాణ వ్యవసాయ ఉత్పత్తులకు అంతర్జాతీయ మార్కెట్లు లభిస్తే రైతులు, బియ్యం మిల్లర్లు, విత్తన కంపెనీలు, ఆహార శుద్ధి పరిశ్రమలు, గ్రామీణ ఆర్థిక వ్యవస్థలోని ఇతర వర్గాలకు ప్రయోజనం కలుగుతుందని ఉత్తమ్ కుమార్ రెడ్డి అన్నారు. రైతులు పండించిన ఉత్పత్తులకు స్థిరమైన, లాభదాయకమైన మార్కెట్లను అందుబాటులోకి తీసుకురావడం ద్వారా వ్యవసాయ రంగాన్ని మరింత బలోపేతం చేయవచ్చని పేర్కొన్నారు.
ఫిలిప్పీన్స్కు బియ్యం, విత్తనాలు, ఇతర వ్యవసాయ ఉత్పత్తులను దీర్ఘకాలికంగా విశ్వసనీయంగా సరఫరా చేయగల ఉత్పత్తి సామర్థ్యం తెలంగాణకు ఉందని మంత్రి ఉద్ఘాటించారు. ఈ చర్చలు కార్యరూపం దాల్చితే తెలంగాణ వ్యవసాయ ఉత్పత్తులకు మరో కీలక అంతర్జాతీయ మార్కెట్ అందుబాటులోకి వచ్చే అవకాశం ఉంది. తద్వారా రాష్ట్ర రైతులు, వ్యవసాయ ఆధారిత పరిశ్రమలకు కొత్త వాణిజ్య అవకాశాలు ఏర్పడే అవకాశం ఉందని మంత్రి ఉత్తమ్ కుమార్ రెడ్డి పేర్కొన్నారు.
