ప్రతిపక్షం, ఆగస్టు 16: పశ్చిమ బెంగాల్ తృణమూల్ కాంగ్రెస్ సీనియర్ నేత, మాజీ డిప్యూటీ స్పీకర్ ఆశిష్ బెనర్జీ మృతి ఘటనలో కీలక పరిణామం చోటుచేసుకుంది. ఘటనాస్థలిలో పోలీసులు సూసైడ్ నోట్ను స్వాధీనం చేసుకున్నారు. తన మరణానికి ఎవరూ కారణం కాదని, ఇకపై తన కుటుంబ సభ్యులు రాజకీయాలకు దూరంగా ఉండాలని అందులో సూచించినట్లు సమాచారం.
ఆశిష్ బెనర్జీ తనను అపఖ్యాతిపాలు చేసేందుకు కొంతకాలంగా ప్రయత్నాలు జరుగుతున్నాయని సూసైడ్ నోట్లో ఆరోపించినట్లు తెలుస్తోంది. ముఖ్యంగా తారాపీఠ్–రాంపూర్హాట్ అభివృద్ధి సంస్థకు సంబంధించిన టెండర్లు, చెక్కులు, నిరభ్యంతర ధ్రువపత్రాల నిర్ణయాల్లో తనకు ఎలాంటి ప్రమేయం లేదని ఆయన స్పష్టం చేసినట్లు సమాచారం.
ఈ వ్యవహారాలకు తనకు ఎలాంటి సంబంధం లేకపోయినా తన పేరును వివాదాల్లోకి లాగుతూ చెడ్డపేరు తెచ్చేందుకు ప్రయత్నాలు జరిగాయని ఆయన పేర్కొన్నట్లు తెలుస్తోంది. దీంతో తీవ్ర మనస్తాపానికి గురై ఆయన ఈ నిర్ణయం తీసుకున్నారా? అనే కోణంలో పోలీసులు దర్యాప్తు చేస్తున్నారు.
ఆశిష్ బెనర్జీ మృతిచెందిన ప్రదేశంలో లభించిన సూసైడ్ నోట్ను పోలీసులు స్వాధీనం చేసుకుని దాని ఆధారంగా విచారణ కొనసాగిస్తున్నారు. నోట్లో పేర్కొన్న అంశాలపై పూర్తి స్థాయిలో దర్యాప్తు చేసి, ఆయనపై వచ్చిన ఆరోపణలు, వాటి వెనుక ఉన్న పరిణామాలను కూడా పరిశీలిస్తున్నట్లు సమాచారం.
ఆశిష్ బెనర్జీ రాంపూర్హాట్ నియోజకవర్గం నుంచి ఐదుసార్లు ఎమ్మెల్యేగా గెలిచారు. మమతా బెనర్జీ ప్రభుత్వంలో డిప్యూటీ స్పీకర్తో పాటు విద్య, వ్యవసాయ శాఖల మంత్రిగా కూడా పనిచేశారు. ఇటీవల జరిగిన ఎన్నికల్లో ఓటమి తర్వాత ఆయన రాజకీయంగా కొంత దూరంగా ఉన్నట్లు తెలుస్తోంది.
సీనియర్ నేతగా సుదీర్ఘకాలం రాజకీయాల్లో కొనసాగిన ఆశిష్ బెనర్జీ మృతి ఇప్పటికే పశ్చిమ బెంగాల్ రాజకీయ వర్గాల్లో కలకలం రేపగా.. తాజాగా సూసైడ్ నోట్ వెలుగులోకి రావడంతో ఈ ఘటనపై మరింత ఉత్కంఠ నెలకొంది. సూసైడ్ నోట్లోని అంశాలపై దర్యాప్తు పూర్తయిన తర్వాత ఆయన మృతికి దారితీసిన అసలు కారణాలు వెలుగులోకి వచ్చే అవకాశం ఉంది.
