ప్రతిపక్షం, జూలై 14: తెలంగాణ రాష్ట్ర ప్రభుత్వ ఉద్యోగులు, ఉపాధ్యాయులు, పెన్షనర్లకు మెరుగైన వైద్య సేవలు అందించేందుకు రూపొందించిన ‘ఎంప్లాయీస్ హెల్త్ స్కీమ్ (EHS)’ మంగళవారం నుంచి అమల్లోకి రానుంది. ఈ పథకం ద్వారా లబ్ధిదారులు నగదు చెల్లించకుండా క్యాష్లెస్ విధానంలో గుర్తింపు పొందిన ఆసుపత్రుల్లో వైద్య సేవలు పొందే అవకాశం కల్పించనున్నారు.
ఈ పథకంలో భాగంగా ప్రతి ఉద్యోగి, పెన్షనర్కు క్యూఆర్ కోడ్తో కూడిన డిజిటల్ హెల్త్ కార్డు జారీ చేయనున్నారు. ఈ కార్డును ఆసుపత్రిలో చూపించడం ద్వారా వైద్య సేవలను సులభంగా పొందవచ్చు. పథకం వినియోగాన్ని మరింత సులభతరం చేయడానికి ప్రభుత్వం EHCT మొబైల్ యాప్ను కూడా అందుబాటులోకి తీసుకురానుంది. ఈ యాప్ ద్వారా హెల్త్ కార్డు వివరాలు, ఆసుపత్రుల జాబితా, చికిత్స వివరాలు, ఇతర సేవలను ఆన్లైన్లో పొందే అవకాశం ఉంటుంది.
ఉద్యోగులపై ఆర్థిక భారం తగ్గించేలా ప్రత్యేక నిబంధనలను ప్రభుత్వం రూపొందించింది. భార్యాభర్తలిద్దరూ ప్రభుత్వ ఉద్యోగులైతే, ఇద్దరి జీతాల నుంచి కాకుండా ఒకరి జీతం నుంచే ఆరోగ్య పథకం చందా మినహాయింపు ఉండేలా నిర్ణయించింది. దీంతో ఉద్యోగులకు అదనపు ప్రయోజనం కలగనుంది.
పథకం సమర్థవంతమైన అమలుకు రాష్ట్రంలోని అన్ని జిల్లా కేంద్రాల్లో వెల్నెస్ సెంటర్లను ఏర్పాటు చేయనున్నారు. ఈ కేంద్రాల ద్వారా ఉద్యోగులు, పెన్షనర్లకు ప్రాథమిక ఆరోగ్య సేవలు, ఆరోగ్య పరీక్షలు, వైద్య సలహాలు, పథకానికి సంబంధించిన సహాయ సేవలు అందుబాటులో ఉంటాయి.
ఉద్యోగులు, ఉపాధ్యాయులు, పెన్షనర్లకు నాణ్యమైన వైద్య సేవలను సులభంగా అందించడమే ఈ పథకం ప్రధాన లక్ష్యమని ప్రభుత్వం పేర్కొంది. రాష్ట్రవ్యాప్తంగా లక్షలాది మంది ఉద్యోగులు, పెన్షనర్లు ఈ ఆరోగ్య పథకం ద్వారా ప్రయోజనం పొందనున్నారని అధికారులు తెలిపారు.
