ప్రతిపక్షం, జూలై 05: తెలంగాణలో పోలీస్ ఉద్యోగాల కోసం ఎంతోకాలంగా ఎదురుచూస్తున్న నిరుద్యోగ యువతకు ప్రభుత్వం శుభవార్త అందించింది. రాష్ట్రంలో మొత్తం 7,437 పోలీస్ ఉద్యోగాల భర్తీకి తెలంగాణ పోలీస్ రిక్రూట్మెంట్ బోర్డు సన్నాహాలు పూర్తి చేసినట్లు సమాచారం. ఈ నియామకాలకు సంబంధించిన డ్రాఫ్ట్ నోటిఫికేషన్ ఇప్పటికే సిద్ధమైందని, ప్రభుత్వ అనుమతులు లభించిన వెంటనే అధికారిక నోటిఫికేషన్ విడుదల చేయనున్నట్లు బోర్డు వర్గాలు వెల్లడించాయి. దీంతో పోలీస్ శాఖలో ఉద్యోగం సాధించాలని లక్ష్యంగా పెట్టుకున్న వేలాది మంది అభ్యర్థుల్లో ఆశలు చిగురించాయి.
ఈ నియామకాల ప్రక్రియలో 3,697 సివిల్ కానిస్టేబుల్, 1,052 ఆర్మ్డ్ రిజర్వ్ (ఏఆర్) కానిస్టేబుల్, 1,380 స్పెషల్ ప్రొటెక్షన్ ఫోర్స్ (ఎస్పీఎఫ్) కానిస్టేబుల్ పోస్టులను భర్తీ చేయనున్నారు. అదనంగా 148 సివిల్ సబ్ ఇన్స్పెక్టర్ (ఎస్ఐ) పోస్టులకు కూడా నోటిఫికేషన్ విడుదల కానుంది. అంతేకాకుండా జైళ్ల శాఖలో జైల్ వార్డెన్ పోస్టులు, అగ్నిమాపక శాఖలో ఫైర్ డిపార్ట్మెంట్ ఉద్యోగాల భర్తీకి సంబంధించిన ప్రకటనలు కూడా ఇదే నియామక ప్రక్రియలో విడుదలయ్యే అవకాశాలు ఉన్నట్లు అధికారులు తెలిపారు.
ప్రభుత్వం నుంచి తుది అనుమతులు వచ్చిన వెంటనే అధికారిక నోటిఫికేషన్ విడుదల చేయనుండగా, అందులో విద్యార్హతలు, వయోపరిమితి, రిజర్వేషన్ నిబంధనలు, దరఖాస్తు విధానం, ఎంపిక ప్రక్రియ, శారీరక దారుఢ్య పరీక్షలు, రాత పరీక్ష, పరీక్షల షెడ్యూల్ తదితర పూర్తి వివరాలను వెల్లడించనున్నారు. పోలీస్ ఉద్యోగాలకు పోటీ తీవ్రంగా ఉండే అవకాశం ఉన్న నేపథ్యంలో అభ్యర్థులు ఇప్పటి నుంచే శారీరక వ్యాయామాలతో పాటు రాత పరీక్షకు అవసరమైన అంశాలపై ప్రణాళికాబద్ధంగా సిద్ధం కావాలని అధికారులు సూచిస్తున్నారు. ఈ భారీ నియామక ప్రక్రియ రాష్ట్రంలోని వేలాది మంది నిరుద్యోగ యువతకు ఉపాధి అవకాశాలను కల్పించనుందని భావిస్తున్నారు.
