ప్రతిపక్షం, జూన్ 12: ఖమ్మం జిల్లాలో సంచలనం రేపిన పోక్సో కేసు వ్యవహారం మరోసారి చర్చనీయాంశంగా మారింది. బాధిత బాలికకు హైదరాబాద్లోని నిమ్స్ ఆస్పత్రిలో సరైన వైద్య సేవలు అందడం లేదని, చికిత్సకు సంబంధించిన కొన్ని ఖర్చులు కుటుంబ సభ్యులే భరిస్తున్నారని బీఆర్ఎస్ సీనియర్ నేత హరీశ్ రావు ఆరోపించారు. ఈ సందర్భంగా రాష్ట్రంలో శాంతిభద్రతల పరిస్థితిపై కూడా ఆయన తీవ్ర విమర్శలు గుప్పించారు.
ఇదిలా ఉండగా, కేసుకు సంబంధించిన బాధితురాలి కుటుంబ సభ్యుల వీడియోలు, వ్యక్తిగత వివరాలు సామాజిక మాధ్యమాల్లో వైరల్ కావడం తీవ్ర ఆందోళనకు గురిచేస్తోంది. ఈ నేపథ్యంలో పోలీసులు అప్రమత్తమై కీలక హెచ్చరిక జారీ చేశారు. పోక్సో చట్టం ప్రకారం బాధిత బాలిక పేరు, ఫోటో, వీడియోలు లేదా ఆమెను గుర్తించే విధంగా ఎలాంటి సమాచారాన్ని ప్రచారం చేయడం చట్టవిరుద్ధమని స్పష్టం చేశారు.
బాధితురాలి గోప్యతను కాపాడటం ప్రతి ఒక్కరి బాధ్యత అని పేర్కొన్న అధికారులు, సోషల్ మీడియాలో వీడియోలు లేదా వివరాలు షేర్ చేసే వారిపై కఠిన చర్యలు తీసుకుంటామని హెచ్చరించారు. పోక్సో నిబంధనలను ఉల్లంఘించిన వారికి ఏడాది వరకు జైలు శిక్షతో పాటు ఇతర చట్టపరమైన చర్యలు కూడా ఎదురయ్యే అవకాశం ఉందని తెలిపారు.
అలాగే కేసుకు సంబంధించిన వివాదాస్పద వీడియో లీక్ వ్యవహారంపై కూడా విచారణ కొనసాగుతోందని, బాధితురాలి గౌరవం, గోప్యతకు భంగం కలిగించే వారెవరైనా చట్టం ముందు బాధ్యత వహించాల్సి ఉంటుందని పోలీసులు స్పష్టం చేశారు. ప్రస్తుతం ఈ ఘటన రాష్ట్రవ్యాప్తంగా చర్చకు దారితీయగా, బాధితుల హక్కుల పరిరక్షణపై మరింత అప్రమత్తంగా ఉండాలని అధికారులు ప్రజలకు సూచించారు.
