ప్రతిపక్షం, జూలై 14: తెలంగాణ రాష్ట్ర అభివృద్ధే తమ ప్రభుత్వ ప్రధాన లక్ష్యమని, అందుకోసం అవసరమైతే ఎన్నిసార్లైనా ఢిల్లీకి వెళ్లేందుకు వెనుకాడబోమని ముఖ్యమంత్రి ఎ. రేవంత్ రెడ్డి స్పష్టం చేశారు. రాజకీయాలకు అతీతంగా కేంద్ర ప్రభుత్వంతో సమన్వయం కొనసాగిస్తూ రాష్ట్రానికి రావాల్సిన నిధులు, అనుమతులు సాధించడమే తమ ప్రభుత్వ ఉద్దేశమని ఆయన పేర్కొన్నారు.
ఢిల్లీలో మీడియాతో మాట్లాడిన సీఎం రేవంత్ రెడ్డి, ఇటీవల హైదరాబాద్లో అన్ని పార్టీల ఎంపీలతో సమావేశం నిర్వహించి రాష్ట్రానికి కేంద్రం నుంచి రావాల్సిన నిధులు, పెండింగ్లో ఉన్న ప్రాజెక్టుల అనుమతులపై విస్తృతంగా చర్చించినట్లు తెలిపారు. తెలంగాణ ప్రయోజనాల విషయంలో రాజకీయ భేదాలు పక్కనపెట్టి అందరూ కలిసి పనిచేయాలని ఆ సమావేశంలో సూచించినట్లు చెప్పారు.
రాష్ట్ర అభివృద్ధికి కీలకమైన మౌలిక వసతుల ప్రాజెక్టులపై కేంద్ర మంత్రులతో వరుసగా సమావేశాలు నిర్వహిస్తున్నట్లు సీఎం వెల్లడించారు. వరంగల్, ఆదిలాబాద్ విమానాశ్రయాల అభివృద్ధికి అవసరమైన అనుమతుల కోసం కేంద్ర పౌర విమానయాన శాఖ మంత్రి రామ్మోహన్ నాయుడిని కలిసినట్లు తెలిపారు. అలాగే రీజినల్ రింగ్ రోడ్ (ఆర్ఆర్ఆర్) ప్రాజెక్టు, జాతీయ రహదారుల విస్తరణ, ఇతర రవాణా మౌలిక సదుపాయాలపై కేంద్ర రహదారుల శాఖ మంత్రి నితిన్ గడ్కరీతో సమావేశమై రాష్ట్ర అవసరాలను వివరించినట్లు చెప్పారు.
తెలంగాణకు సంబంధించిన ప్రతి అభివృద్ధి ప్రాజెక్టును వేగవంతం చేయడానికి కేంద్ర ప్రభుత్వ సహకారం అవసరమని, రాష్ట్ర ప్రయోజనాల కోసం కేంద్రంతో సానుకూల సంబంధాలు కొనసాగిస్తామని సీఎం రేవంత్ రెడ్డి పేర్కొన్నారు. పెండింగ్లో ఉన్న ప్రాజెక్టులకు త్వరితగతిన అనుమతులు, నిధులు లభించేలా తమ ప్రభుత్వం నిరంతరం కృషి చేస్తుందని ఆయన స్పష్టం చేశారు.
