ప్రతిపక్షం, జూన్ 10: తెలంగాణ కాంగ్రెస్ వ్యవహారాల ఇన్చార్జి మీనాక్షి నటరాజన్ రాజ్యసభ నామినేషన్ తిరస్కరణ నేపథ్యంలో ఆమెపై నమోదైన క్రిమినల్ కేసు రాజకీయ వర్గాల్లో చర్చనీయాంశంగా మారింది. హైదరాబాద్ నాంపల్లి కోర్టులో 2025 ఆగస్టు 20న ఎ. శ్రీలత అనే మహిళ దాఖలు చేసిన పరువునష్టం కేసులో మీనాక్షి నటరాజన్ను నాలుగో నిందితురాలిగా చేర్చారు. ఈ కేసులో భారతీయ న్యాయ సంహితలోని పలు సెక్షన్లు ప్రస్తావించబడ్డాయి.
ఈ కేసు వివరాలను నామినేషన్ పరిశీలన సందర్భంగా పరిగణనలోకి తీసుకున్న ఎన్నికల అధికారులు, అభ్యర్థి సమర్పించిన పత్రాలపై అభ్యంతరాలు వ్యక్తం చేసినట్లు సమాచారం. నామినేషన్ దాఖలు సమయంలో క్రిమినల్ కేసుల వివరాలు, ఇతర అంశాల వెల్లడిపై వచ్చిన ఫిర్యాదుల నేపథ్యంలో రిటర్నింగ్ అధికారి పరిశీలన జరిపి నామినేషన్ను తిరస్కరించినట్లు తెలుస్తోంది.
అయితే ఈ కేసు పూర్తిగా రాజకీయ ప్రేరేపితమైందని కాంగ్రెస్ నేతలు ఆరోపిస్తున్నారు. తనపై నమోదు చేసిన కేసును కొట్టివేయాలని మీనాక్షి నటరాజన్ గతంలో కోర్టును ఆశ్రయించినప్పటికీ, ఆ విజ్ఞప్తిని న్యాయస్థానం పరిగణనలోకి తీసుకోలేదని సమాచారం. నామినేషన్ తిరస్కరణ వ్యవహారంలో రిటర్నింగ్ అధికారి పక్షపాత ధోరణితో వ్యవహరించారని తెలంగాణ కాంగ్రెస్ అధ్యక్షుడు మహేశ్ కుమార్ గౌడ్ విమర్శించారు.
మరోవైపు, ఎన్నికల ప్రక్రియలో నిబంధనల అమలే జరిగిందని ప్రతిపక్షాలు పేర్కొంటుండగా, కాంగ్రెస్ మాత్రం దీనిని రాజకీయ కుట్రగా అభివర్ణిస్తోంది. ఈ పరిణామం రాజ్యసభ ఎన్నికల రాజకీయ వేడిని మరింత పెంచింది
