ప్రతిపక్షం, జూన్ 25: కర్ణాటక, ఆంధ్రప్రదేశ్, తెలంగాణ రాష్ట్రాలకు కీలకమైన తుంగభద్ర ప్రాజెక్టులో కొత్త గేట్ల ప్రారంభోత్సవం కర్ణాటకలోని హోస్పేట్లో ఘనంగా నిర్వహించారు. ఈ కార్యక్రమంలో కర్ణాటక ముఖ్యమంత్రి, ఆంధ్రప్రదేశ్ ముఖ్యమంత్రి చంద్రబాబు నాయుడు, తెలంగాణ ముఖ్యమంత్రి రేవంత్ రెడ్డి, కేంద్ర జలశక్తి మంత్రి సీఆర్ పాటిల్ పాల్గొన్నారు. రాజకీయ భేదాలకు అతీతంగా నేతలు పరస్పరం ఆత్మీయంగా పలకరించుకోవడం ప్రత్యేక ఆకర్షణగా నిలిచింది.
గత ఏడాది భారీ వరదల కారణంగా తుంగభద్ర ఆనకట్టలోని 19వ గేటు దెబ్బతినడంతో భద్రతాపరమైన ఆందోళనలు వ్యక్తమయ్యాయి. అనంతరం తాత్కాలికంగా స్టాప్ లాక్ గేటును ఏర్పాటు చేసి నీటి నిర్వహణ కొనసాగించారు. ఆనకట్ట భద్రతను మరింత పటిష్ఠం చేయాలన్న లక్ష్యంతో నిపుణుల సూచనల మేరకు కొత్త గేట్ల ఏర్పాటు చేపట్టారు.
కర్ణాటక, ఆంధ్రప్రదేశ్ ప్రభుత్వాల సంయుక్త సహకారంతో సుమారు రూ.51 కోట్ల వ్యయంతో మొత్తం 33 కొత్త గేట్లను ఏర్పాటు చేశారు. ఈ గేట్లతో ఆనకట్ట భద్రత మెరుగుపడటంతో పాటు నీటి నిర్వహణ సామర్థ్యం కూడా పెరుగుతుందని అధికారులు తెలిపారు.
తుంగభద్ర ప్రాజెక్టు మూడు రాష్ట్రాల వ్యవసాయ, తాగునీటి అవసరాలకు కీలక ఆధారంగా ఉండటంతో ఈ గేట్ల ప్రారంభోత్సవానికి ప్రత్యేక ప్రాధాన్యం ఏర్పడింది. ప్రాజెక్టు ఆధునికీకరణతో భవిష్యత్తులో నీటి నిల్వ, పంపిణీ వ్యవస్థ మరింత సమర్థవంతంగా మారుతుందని అధికారులు ఆశాభావం వ్యక్తం చేస్తున్నారు.
