ప్రతిపక్షం, జూన్ 05: ఉమ్మడి మహబూబ్నగర్ జిల్లాలో సాగునీటి ప్రాజెక్టుల అభివృద్ధికి రాష్ట్ర ప్రభుత్వం అత్యంత ప్రాధాన్యత ఇస్తోందని ముఖ్యమంత్రి ఎ. రేవంత్ రెడ్డి స్పష్టం చేశారు. జిల్లాలో జరుగుతున్న ప్రధాన నీటి పారుదల ప్రాజెక్టుల పనులను క్షేత్రస్థాయిలో పరిశీలించేందుకు చేపట్టిన పర్యటనలో భాగంగా ఆయన జవహర్ నెట్టెంపాడు ఎత్తిపోతల పథకాన్ని సందర్శించి పనుల పురోగతిని సమీక్షించారు.
మక్తల్–నారాయణపేట–కొడంగల్ ఎత్తిపోతల పథకం పనులను పరిశీలించిన అనంతరం ముఖ్యమంత్రి వివిధ సాగునీటి ప్రాజెక్టులపై సమగ్ర అవగాహన కోసం ఏరియల్ సర్వే నిర్వహించారు. ఈ సందర్భంగా కోయిల్ సాగర్ ప్రాజెక్టు, భీమా మరియు కృష్ణా నదులపై ప్రతిపాదిత బ్యారేజీల నిర్మాణ ప్రాంతాలు, ప్రియదర్శిని జూరాల ప్రాజెక్టు డ్యామ్ ప్రాంతాన్ని గగనతల మార్గంలో పరిశీలించారు. ప్రాజెక్టుల ప్రస్తుత పరిస్థితి, భవిష్యత్ అవసరాలు, నీటి వినియోగ అవకాశాలపై అధికారులతో చర్చించారు.
అనంతరం జోగులాంబ గద్వాల జిల్లా ధారూర్ మండలంలోని గూడెందొడ్డి గ్రామానికి చేరుకున్న ముఖ్యమంత్రి జవహర్ నెట్టెంపాడు ఎత్తిపోతల పథకంలో భాగంగా నిర్మిస్తున్న స్టేజీ–1 పంప్ హౌస్ను సందర్శించారు. అక్కడ జరుగుతున్న నిర్మాణ పనులను నేరుగా పరిశీలించి, ప్రాజెక్టు పురోగతిపై నీటి పారుదల శాఖ ఉన్నతాధికారులను వివరాలు అడిగి తెలుసుకున్నారు.
పంప్ హౌస్ నిర్మాణం, యంత్రాల ఏర్పాటు, విద్యుత్ వ్యవస్థలు, నీటి తరలింపు సామర్థ్యం, మిగిలిన పనులపై అధికారులు ముఖ్యమంత్రికి సమగ్ర నివేదిక అందించారు. పనులను నిర్ణీత గడువులోగా పూర్తి చేసి రైతులకు త్వరితగతిన ప్రయోజనం చేకూరేలా చర్యలు తీసుకోవాలని ముఖ్యమంత్రి సూచించారు. నాణ్యత విషయంలో ఎలాంటి రాజీ పడకుండా పనులు చేపట్టాలని అధికారులను ఆదేశించారు.
ఈ సందర్భంగా ప్రాజెక్టుకు సంబంధించిన ప్రత్యేక లఘు చిత్రాన్ని ముఖ్యమంత్రి వీక్షించారు. నెట్టెంపాడు పథకం ద్వారా సాగునీటి విస్తీర్ణం పెరగడం, భూగర్భ జలాలు మెరుగుపడడం, రైతులకు స్థిరమైన నీటి వనరు అందుబాటులోకి రావడం వంటి అంశాలను అధికారులు వివరించారు. ప్రాజెక్టు పూర్తయితే ఈ ప్రాంత వ్యవసాయ రంగంలో గణనీయమైన మార్పులు చోటుచేసుకుంటాయని తెలిపారు.
ముఖ్యమంత్రి వెంట నీటి పారుదల శాఖ మంత్రి ఎన్. ఉత్తమ్ కుమార్ రెడ్డి, మంత్రి వాకిటి శ్రీహరి, ప్రజాప్రతినిధులు, నీటి పారుదల శాఖ ఉన్నతాధికారులు పాల్గొన్నారు. ఉమ్మడి మహబూబ్నగర్ జిల్లాను సాగునీటి పరంగా బలోపేతం చేయడమే లక్ష్యంగా ప్రభుత్వం ముందుకు సాగుతోందని ఈ సందర్భంగా నాయకులు పేర్కొన్నారు.
జిల్లాలో పెండింగ్లో ఉన్న సాగునీటి ప్రాజెక్టులను వేగంగా పూర్తి చేసి రైతులకు పూర్తి స్థాయిలో నీటి వనరులు అందించేందుకు ప్రభుత్వం కట్టుబడి ఉందని ముఖ్యమంత్రి రేవంత్ రెడ్డి స్పష్టం చేశారు. రైతుల అభివృద్ధే ప్రభుత్వ ప్రధాన లక్ష్యమని, నీటి పారుదల రంగాన్ని మరింత బలోపేతం చేసేందుకు అవసరమైన అన్ని చర్యలు తీసుకుంటామని తెలిపారు.
