ప్రతిపక్షం, జూలై 08: హైదరాబాద్లోని గుడిమల్కాపూర్ వెజిటబుల్ అండ్ ఫ్లవర్ మార్కెట్ను మొయినాబాద్కు తరలించే ప్రతిపాదనపై ఎంఐఎం ఎమ్మెల్యేలు అభ్యంతరం వ్యక్తం చేశారు. ఈ మేరకు తెలంగాణ ప్రభుత్వ ప్రధాన కార్యదర్శి సంజయ్ జాజును ఎంఐఎం ఎమ్మెల్యేలు కౌసర్ మొహియుద్దీన్, మజీద్ హుస్సేన్ కలిసి వినతిపత్రం సమర్పించారు.
గుడిమల్కాపూర్ మార్కెట్ను ప్రస్తుత ప్రాంతం నుంచి మొయినాబాద్కు తరలించే నిర్ణయాన్ని ప్రభుత్వం పునఃసమీక్షించాలని వారు కోరారు. ఈ మార్కెట్పై ఆధారపడి వేలాది మంది వ్యాపారులు, కార్మికులు, రవాణా కార్మికులు జీవనోపాధి పొందుతున్నారని తెలిపారు.
మార్కెట్ను తరలిస్తే సుమారు 10 వేల కుటుంబాల జీవనోపాధిపై తీవ్ర ప్రభావం పడుతుందని ఎమ్మెల్యేలు ఆందోళన వ్యక్తం చేశారు. దశాబ్దాలుగా కొనసాగుతున్న ఈ మార్కెట్ నగర ప్రజలకు కూరగాయలు, పూల సరఫరాలో కీలక కేంద్రంగా ఉందని పేర్కొన్నారు.
వ్యాపారులు, రైతులు, వినియోగదారుల ప్రయోజనాలను దృష్టిలో ఉంచుకుని మార్కెట్ను ప్రస్తుత ప్రాంతంలోనే కొనసాగించాలని ప్రభుత్వాన్ని కోరారు. సంబంధిత వర్గాలతో సంప్రదింపులు జరపకుండా మార్కెట్ తరలింపు నిర్ణయం తీసుకోవద్దని విజ్ఞప్తి చేశారు.
ఈ అంశంపై ప్రభుత్వం సానుకూలంగా స్పందించి, వేలాది కుటుంబాల జీవనోపాధిని కాపాడేలా నిర్ణయం తీసుకోవాలని ఎంఐఎం ప్రతినిధులు కోరారు. ప్రస్తుతం ఈ వినతిపై ప్రభుత్వ నిర్ణయం కోసం వ్యాపారులు, స్థానికులు ఎదురుచూస్తున్నారు.
