ప్రతిపక్షం, జూలై 05: మహబూబ్నగర్ జిల్లా మిడ్జిల్ మండల అభివృద్ధికి తెలంగాణ ప్రభుత్వం మరో కీలక అడుగు వేసింది. ముఖ్యమంత్రి ఎ. రేవంత్ రెడ్డి మిడ్జిల్ పర్యటన సందర్భంగా మొత్తం రూ.47.08 కోట్ల విలువైన పలు అభివృద్ధి పనులకు శంకుస్థాపన చేశారు. ఉప ముఖ్యమంత్రి మల్లు భట్టి విక్రమార్క, రాష్ట్ర మంత్రులు, జిల్లా ప్రజాప్రతినిధులు, ఉన్నతాధికారులతో కలిసి నిర్వహించిన ఈ కార్యక్రమంలో ప్రజల అవసరాలకు అనుగుణంగా ఆలయాభివృద్ధి, గ్రామీణ మౌలిక వసతులు, సాగునీటి సదుపాయాల బలోపేతానికి సంబంధించిన ప్రాజెక్టులను ప్రారంభించారు.
ఈ సందర్భంగా ఊరుకొండపేటలోని శ్రీ ఆంజనేయస్వామి ఆలయ అభివృద్ధి కోసం రూ.10 కోట్లతో చేపట్టనున్న పనులకు సీఎం శంకుస్థాపన చేశారు. ఆలయాన్ని ఆధ్యాత్మిక, పర్యాటక కేంద్రంగా తీర్చిదిద్దే లక్ష్యంతో ఈ పనులు చేపడుతున్నట్లు తెలిపారు. అలాగే పాత మిడ్జిల్ మండల పరిధిలోని 40 గ్రామ పంచాయతీల సమగ్ర అభివృద్ధి కోసం రూ.20 కోట్లతో చేపట్టనున్న అభివృద్ధి కార్యక్రమాలకు శ్రీకారం చుట్టారు. మండలాల పునర్విభజన అనంతరం ప్రస్తుతం మిడ్జిల్ మండలంలో 24 గ్రామాలు, ఊరుకొండ మండలంలో 16 గ్రామాలు ఉన్నప్పటికీ అన్ని గ్రామాల అభివృద్ధిని సమానంగా కొనసాగించనున్నట్లు ప్రభుత్వం స్పష్టం చేసింది.
సాగునీటి వనరులను మెరుగుపర్చే లక్ష్యంతో రూ.17.08 కోట్ల వ్యయంతో చెక్డ్యామ్ల నిర్మాణ పనులకు కూడా సీఎం శంకుస్థాపన చేశారు. ఇందులో భైరాంపల్లి గ్రామ సమీపంలోని దుంధుబి వాగుపై చెక్డ్యామ్, వడియాల్ గ్రామం సమీపంలోని చిన్న వాగుపై చెక్డ్యామ్, వస్పుల గ్రామం సమీపంలోని వస్పుల కత్వా పునరుద్ధరణ పనులు చేపట్టనున్నారు. ఈ ప్రాజెక్టుల ద్వారా భూగర్భ జలాలు పెరగడంతో పాటు రైతులకు సాగునీటి సౌకర్యం మెరుగుపడుతుందని అధికారులు తెలిపారు.
మిడ్జిల్ ప్రాంతాన్ని అన్ని రంగాల్లో అభివృద్ధి చేయడమే ప్రభుత్వ లక్ష్యమని సీఎం రేవంత్ రెడ్డి పేర్కొన్నారు. గ్రామీణ ప్రాంతాల్లో మౌలిక సదుపాయాల కల్పన, దేవాలయాల అభివృద్ధి, నీటి వనరుల పరిరక్షణ వంటి అంశాలకు ప్రభుత్వం అత్యంత ప్రాధాన్యం ఇస్తోందన్నారు. ఈ అభివృద్ధి పనులు పూర్తయిన తర్వాత ప్రజలకు మెరుగైన వసతులు అందడంతో పాటు వ్యవసాయం, పర్యాటక రంగాలకు కూడా ఊతం లభిస్తుందని ఆయన ఆశాభావం వ్యక్తం చేశారు.
