ప్రతిపక్షం, జూన్ 05: ప్రపంచ పర్యావరణ దినోత్సవం సందర్భంగా హైదరాబాద్లోని కృష్ణకాంత్ పార్క్లో నిర్వహించిన కార్యక్రమంలో మంత్రి పొన్నం ప్రభాకర్ మొక్కలు నాటి పర్యావరణ పరిరక్షణపై అవగాహన కల్పించారు. ప్రజాపాలన–ప్రగతి ప్రణాళికలో భాగంగా అటవీ శాఖ ఆధ్వర్యంలో 12 రోజుల పాటు ప్రత్యేక కార్యక్రమాలు నిర్వహిస్తున్నట్లు తెలిపారు.
ఈ సందర్భంగా మాట్లాడుతూ, పర్యావరణ పరిరక్షణ ప్రతి ఒక్కరి బాధ్యత అని పేర్కొన్నారు. చరిత్రలో అశోక చక్రవర్తి చేపట్టిన వృక్షారోపణ కార్యక్రమాలు నేటికీ ఆదర్శంగా నిలుస్తున్నాయని గుర్తుచేశారు. భవిష్యత్ తరాలకు స్వచ్ఛమైన వాతావరణాన్ని అందించాలంటే ప్రతి వ్యక్తి తప్పనిసరిగా మొక్కలు నాటాలని పిలుపునిచ్చారు.
పెరుగుతున్న కాలుష్యం, వాతావరణ మార్పులు ప్రపంచ దేశాలకు సవాల్గా మారాయని మంత్రి ఆందోళన వ్యక్తం చేశారు. ఢిల్లీ వంటి నగరాలు తీవ్ర కాలుష్య సమస్యలను ఎదుర్కొంటున్నాయని, హైదరాబాద్లో అలాంటి పరిస్థితులు రాకుండా ముందస్తు చర్యలు తీసుకోవాల్సిన అవసరం ఉందన్నారు. విద్యుత్ వాహనాల వినియోగాన్ని ప్రోత్సహించడం ద్వారా కాలుష్యాన్ని గణనీయంగా తగ్గించవచ్చని సూచించారు.
భవిష్యత్తులో వర్షపాతం తగ్గే ప్రమాదం ఉందని హెచ్చరించిన మంత్రి, నీటి వనరులను సంరక్షించడం అత్యవసరమని చెప్పారు. భూగర్భ జలాలు క్షీణిస్తున్న నేపథ్యంలో బోర్లు వేసినా నీరు లభించని పరిస్థితులు ఏర్పడే అవకాశం ఉందన్నారు. అందువల్ల ప్రతి ఇంట్లో ఇంకుడు గుంతలు ఏర్పాటు చేసి వర్షపు నీటిని భూగర్భంలోకి పంపే చర్యలు చేపట్టాలని కోరారు.
ప్లాస్టిక్ వినియోగాన్ని తగ్గించి, పర్యావరణానికి హాని కలిగించని ప్రత్యామ్నాయ వస్తువులను ఉపయోగించాలని ప్రజలకు సూచించారు. ప్రకృతిని కాపాడితేనే భవిష్యత్ తరాలకు సురక్షితమైన జీవన వాతావరణం అందించగలమని మంత్రి పొన్నం ప్రభాకర్ స్పష్టం చేశారు.
ఈ కార్యక్రమంలో స్థానిక ప్రజాప్రతినిధులు, జిల్లా అధికారులు, అటవీ శాఖ సిబ్బంది పాల్గొని పర్యావరణ పరిరక్షణకు తమ వంతు కృషి చేయాలని ప్రతిజ్ఞ చేశారు.
