ప్రతిపక్షం, జూలై 24: ప్రజా రవాణాలో ప్రయాణించే వారిని లక్ష్యంగా చేసుకుని దొంగలు రెచ్చిపోతున్న ఘటనలు కొనసాగుతున్నాయి. తాజాగా ఆర్టీసీ బస్సులో ప్రయాణిస్తున్న కేంద్ర పన్నుల శాఖ ఇన్స్పెక్టర్ మెడలోని బంగారు గొలుసును గుర్తుతెలియని వ్యక్తి చాకచక్యంగా అపహరించిన ఘటన హైదరాబాద్లో చోటుచేసుకుంది. ఈ సంఘటనతో బస్సు ప్రయాణికులు అప్రమత్తంగా ఉండాలని పోలీసులు సూచిస్తున్నారు.
పోలీసుల వివరాల ప్రకారం.. కేపీహెచ్బీ ప్రాంతానికి చెందిన కేంద్ర పన్నుల శాఖ ఇన్స్పెక్టర్ ఎన్ఎండీసీ బస్టాప్ వద్ద ఆర్టీసీ బస్సు ఎక్కి లక్డీకాపూల్ వరకు ప్రయాణించారు. బస్సు దిగిన తర్వాత తన మెడలో ఉన్న సుమారు 10 గ్రాముల బంగారు గొలుసు కనిపించకపోవడంతో చోరీ జరిగినట్లు గుర్తించారు. వెంటనే ఖైరతాబాద్ పోలీసులను ఆశ్రయించి ఫిర్యాదు చేశారు.
బాధితుడి ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. బస్సులో ఉన్న ప్రయాణికుల వివరాలతో పాటు మార్గమధ్యంలోని నిఘా కెమెరాల దృశ్యాలను పరిశీలిస్తూ నిందితుడి ఆచూకీ కోసం గాలిస్తున్నారు. చోరీకి పాల్పడింది జేబుదొంగల ముఠానా లేదా ఒంటరి వ్యక్తినా అనే కోణంలో కూడా విచారణ కొనసాగుతోంది.
ఇటీవల రద్దీ ప్రాంతాలు, బస్సులు, బస్టాప్లలో గొలుసులు, విలువైన వస్తువుల చోరీలు పెరుగుతున్న నేపథ్యంలో ప్రయాణికులు అప్రమత్తంగా ఉండాలని పోలీసులు సూచించారు. ముఖ్యంగా రద్దీ సమయంలో బంగారు ఆభరణాలు, విలువైన వస్తువుల విషయంలో జాగ్రత్తలు పాటించాలని, అనుమానాస్పద వ్యక్తులు కనిపిస్తే వెంటనే పోలీసులకు సమాచారం అందించాలని విజ్ఞప్తి చేశారు.
