ప్రతిపక్షం, సెప్టెంబర్ 02: మధ్యప్రదేశ్లోని మొరెనా జిల్లాకు చెందిన సీఆర్పీఎఫ్ జవాన్ గిర్వార్సింగ్ తోమర్ 27 ఏళ్ల సుదీర్ఘ న్యాయపోరాటం తర్వాత ఎట్టకేలకు తిరిగి ఉద్యోగంలో చేరారు. దాదాపు మూడు దశాబ్దాల పాటు సాగిన న్యాయపోరాటంలో కోర్టు నుంచి అనుకూల ఉత్తర్వులు రావడంతో ఆయన మళ్లీ విధుల్లోకి అడుగుపెట్టారు. ఉద్యోగం కోల్పోయిన తర్వాత జీవితంలో ఎన్నో ఒడిదుడుకులు ఎదుర్కొన్న ఆయన.. చివరకు తన ఉద్యోగాన్ని తిరిగి సాధించుకున్నారు.
గిర్వార్సింగ్ తోమర్ 1999లో సీఆర్పీఎఫ్లో విధులు నిర్వహిస్తున్న సమయంలో ఓ ఉన్నతాధికారితో వివాదం తలెత్తింది. ఈ వివాదం కారణంగా ఆయనను విధుల నుంచి తొలగించినట్లు సమాచారం. ఉద్యోగం కోల్పోవడంతో తీవ్ర నిరాశకు గురైన ఆయన తన స్వస్థలానికి తిరిగి వెళ్లారు. అనంతరం సాధువుగా మారి ‘గిర్వార్దాస్ మహారాజ్’ అనే పేరుతో జీవనం సాగించడం ప్రారంభించారు.
అయితే ఉద్యోగం కోల్పోయినప్పటికీ తన హక్కును వదులుకోని గిర్వార్సింగ్.. తిరిగి విధుల్లో చేరేందుకు న్యాయపోరాటాన్ని కొనసాగించారు. సంవత్సరాలు గడిచినా ఆయన పోరాటం ఆపలేదు. ఒకవైపు సాధువు జీవితాన్ని కొనసాగిస్తూనే మరోవైపు తన ఉద్యోగాన్ని తిరిగి పొందేందుకు న్యాయస్థానాలను ఆశ్రయిస్తూ వచ్చారు. ఈ క్రమంలో ఆయన దాదాపు 27 సంవత్సరాల పాటు న్యాయపోరాటం చేశారు.
తాజాగా కోర్టు ఆయనకు అనుకూలంగా ఆదేశాలు జారీ చేయడంతో ఉద్యోగంలోకి తిరిగి వచ్చే అవకాశం లభించింది. కోర్టు ఉత్తర్వుల మేరకు ఛత్తీస్గఢ్లోని బీజాపూర్లో ఆయన మళ్లీ విధుల్లో చేరారు. ఎన్నో సంవత్సరాల విరామం తర్వాత సీఆర్పీఎఫ్ విధుల్లోకి తిరిగి వచ్చిన గిర్వార్సింగ్ కథ ప్రస్తుతం ఆసక్తికరంగా మారింది.
27 ఏళ్ల పాటు ఉద్యోగం కోసం న్యాయపోరాటం చేసిన అనంతరం తిరిగి విధుల్లో చేరడం ఆయన పట్టుదలకు నిదర్శనంగా నిలుస్తోంది. ఉద్యోగం కోల్పోయిన తర్వాత సాధువుగా మారినప్పటికీ.. తన ఉద్యోగ హక్కు కోసం ఆయన చేసిన పోరాటాన్ని మాత్రం కొనసాగించారు. చివరకు కోర్టు ఆదేశాలతో తిరిగి సీఆర్పీఎఫ్ విధుల్లో చేరడంతో ఆయన సుదీర్ఘ పోరాటానికి ముగింపు లభించింది.
