ప్రతిపక్షం, నవంబర్ 07: ఇరాన్ అణు కార్యక్రమానికి సంబంధించిన కీలక సమాచారం సేకరించేందుకు అమెరికా భారీ బహుమతిని ప్రకటించింది. ఇరాన్ న్యూక్లియర్ ప్రోగ్రామ్‌కు సంబంధించిన రహస్యాలు వెల్లడించే వారికి 20 మిలియన్ డాలర్లకు పైగా (సుమారు రూ.188 కోట్లు) రివార్డు అందిస్తామని ప్రకటించినట్లు సమాచారం. అంతేకాకుండా కీలక సమాచారం అందించే వ్యక్తులకు ఆర్థిక బహుమతితో పాటు ఇరాన్ నుంచి సురక్షితంగా బయటకు తీసుకువచ్చి మరో ప్రాంతంలో స్థిరపడే అవకాశం కల్పిస్తామని ఆఫర్ ఇచ్చింది. ఇరాన్ అణు కార్యకలాపాలపై అంతర్జాతీయంగా ఆందోళనలు కొనసాగుతున్న నేపథ్యంలో అమెరికా తీసుకున్న ఈ చర్య ప్రాధాన్యత సంతరించుకుంది.
ఇరాన్‌లోని అణు కేంద్రాలు, అక్కడ పనిచేస్తున్న శాస్త్రవేత్తలు, సిబ్బంది, అణు కార్యక్రమాలకు సంబంధించిన సాంకేతిక పరిజ్ఞానం, ఇతర కీలక వ్యవస్థల గురించి సమాచారం అందించే వారికి ఈ రివార్డు వర్తిస్తుందని అమెరికా పేర్కొన్నట్లు తెలుస్తోంది. ముఖ్యంగా ఇరాన్ అణు కార్యక్రమం ఎలా కొనసాగుతోంది? ఎక్కడెక్కడ అణు పరిశోధనలు జరుగుతున్నాయి? వాటికి సంబంధించిన కీలక వ్యక్తులు ఎవరు? అణు సాంకేతిక పరిజ్ఞానాన్ని ఏ విధంగా అభివృద్ధి చేస్తున్నారు? వంటి అంశాలపై విశ్వసనీయ సమాచారం అందించాలని అమెరికా భావిస్తోంది. సమాచారం ఇచ్చే వ్యక్తుల భద్రతకు కూడా హామీ కల్పించే విధంగా ఇరాన్ నుంచి బయటకు తీసుకువచ్చి మరో ప్రాంతంలో పునరావాసం కల్పిస్తామని ప్రకటించడం ఈ ఆఫర్‌లో కీలక అంశంగా మారింది.
మరోవైపు ఇరాన్ యురేనియం శుద్ధి ప్రక్రియపై అమెరికా తీవ్ర ఆందోళన వ్యక్తం చేస్తోంది. ఇరాన్ యురేనియం ఎన్‌రిచ్‌మెంట్ స్థాయి 60 శాతాన్ని దాటినట్లు అమెరికా ఆందోళన చెందుతోంది. సాధారణంగా అణు విద్యుత్ ఉత్పత్తికి ఉపయోగించే యురేనియం శుద్ధి స్థాయితో పోలిస్తే 60 శాతం ఎన్‌రిచ్‌మెంట్ అనేది అత్యంత అధిక స్థాయి. అణ్వాయుధాల తయారీకి అవసరమైన స్థాయి 90 శాతానికి సమీపంలో ఉంటుంది. ఈ నేపథ్యంలో ఇరాన్ అణు కార్యక్రమం భవిష్యత్తులో ఎలాంటి పరిణామాలకు దారితీస్తుందనే అంశంపై అమెరికా, ఇతర పాశ్చాత్య దేశాలు నిశితంగా పరిశీలిస్తున్నాయి.
ఇరాన్ మాత్రం తన అణు కార్యక్రమం శాంతియుత అవసరాల కోసమేనని గతంలో పలుమార్లు స్పష్టం చేసింది. అణ్వాయుధాలను తయారు చేయాలనే ఉద్దేశం తమకు లేదని చెబుతోంది. అయితే యురేనియం శుద్ధి స్థాయి పెరగడం, అణు కేంద్రాల కార్యకలాపాలపై స్పష్టత లేకపోవడం వంటి అంశాలు అమెరికా, ఇరాన్ మధ్య ఉద్రిక్తతలకు కారణమవుతున్నాయి. తాజాగా భారీ రివార్డు ప్రకటనతో ఇరాన్ అణు కార్యక్రమానికి సంబంధించిన సమాచారం సేకరించేందుకు అమెరికా ప్రయత్నాలను మరింత ముమ్మరం చేసినట్లు కనిపిస్తోంది. ఈ పరిణామం ఇరాన్-అమెరికా సంబంధాలపై ఎలాంటి ప్రభావం చూపుతుందన్నది అంతర్జాతీయ రాజకీయాల్లో ఆసక్తికరంగా మారింది.
