ప్రతిపక్షం, నవంబర్ 04: అమెరికా అణుదాడికి పాల్పడే అవకాశం ఉందంటూ వస్తున్న వార్తల నేపథ్యంలో ఇరాన్ ప్రభుత్వం తమ పౌరులకు కీలక హెచ్చరికలు జారీ చేసినట్లు సమాచారం. అణుదాడి జరిగితే వెలువడే రేడియేషన్ ప్రభావం నుంచి తమను తాము రక్షించుకోవడానికి తీసుకోవాల్సిన జాగ్రత్తలను వివరిస్తూ అడ్వైజరీ విడుదల చేసినట్లు తెలుస్తోంది. ప్రజలు అప్రమత్తంగా ఉండాలని, అత్యవసర పరిస్థితులు ఎదురైతే సూచించిన భద్రతా చర్యలను పాటించాలని అధికారులు సూచించినట్లు వార్తలు వెలువడ్డాయి.
అణు దాడి జరిగిన సందర్భంలో ముందుగా ఇళ్లలోని ఏసీలను, బయట గాలిని లోపలికి పంపించే వ్యవస్థలను నిలిపివేయాలని సూచించినట్లు సమాచారం. బయట నుంచి కలుషితమైన గాలి ఇంట్లోకి రాకుండా తలుపులు, కిటికీలను మూసి ఉంచాలని పేర్కొన్నట్లు తెలుస్తోంది. దాడి అనంతరం కనీసం 24 గంటల పాటు సురక్షితమైన ప్రదేశాల్లోనే ఉండాలని, అత్యవసర పరిస్థితుల్లో బయటకు వెళ్లకుండా జాగ్రత్తలు తీసుకోవాలని సూచించినట్లు సమాచారం.
ఆహారం విషయంలోనూ ప్రత్యేక జాగ్రత్తలు పాటించాలని అడ్వైజరీలో పేర్కొన్నట్లు తెలుస్తోంది. బయట బహిరంగంగా ఉంచిన ఆహార పదార్థాలను తీసుకోకుండా, ప్యాక్ చేసిన ఆహారాన్ని మాత్రమే తినాలని సూచించినట్లు సమాచారం. వాహనాల్లో ఉండటం కంటే భవనాల లోపల సురక్షిత ప్రాంతాల్లో ఆశ్రయం పొందాలని హెచ్చరించినట్లు తెలుస్తోంది. అణుదాడి సమయంలో వెలుగు లేదా పేలుడు కనిపించినప్పుడు ఆ దిశగా నేరుగా చూడకూడదని, వెంటనే తల, ముఖాన్ని కప్పుకోవాలని సూచించినట్లు సమాచారం. నేలవైపు ముఖం పెట్టి పడుకుని శరీరాన్ని సాధ్యమైనంత వరకు కప్పుకోవాలని కూడా పేర్కొన్నట్లు వార్తలు చెబుతున్నాయి.
అణు దాడి సంభవిస్తే రేడియేషన్ ప్రభావం తీవ్రంగా ఉండే అవకాశం ఉన్నందున ప్రజలు ముందస్తు జాగ్రత్తలు తీసుకోవాలని ఇరాన్ ప్రభుత్వం సూచించినట్లు ప్రచారం జరుగుతోంది. అయితే అమెరికా అణుదాడి చేయబోతోందన్న వార్తలకు సంబంధించి, ఇరాన్ అడ్వైజరీలోని వివరాలకు సంబంధించి అధికారిక ప్రకటనలు, స్వతంత్ర ధృవీకరణ అవసరం.
