ప్రతిపక్షం, సెప్టెంబర్ 03: సొంతంగా ఇల్లు నిర్మించుకోవాలని భావిస్తున్న వారికి నిర్మాణ ఖర్చులు మరింత భారమయ్యే అవకాశం కనిపిస్తోంది. సిమెంట్ తయారీ సంస్థలు ధరలను పెంచేందుకు సిద్ధమవుతున్నట్లు మార్కెట్ వర్గాలు వెల్లడించాయి. ఈ నెల 5వ తేదీ నుంచి సిమెంట్ బస్తాపై రూ.30 నుంచి రూ.40 వరకు ధర పెంచే యోచనలో కంపెనీలు ఉన్నట్లు సమాచారం.
ప్రస్తుతం నిర్మాణ రంగంలో ఇప్పటికే ఇసుక, ఇనుము, ఇటుకలు, ఇతర నిర్మాణ సామగ్రి ధరల ప్రభావం ఉండగా.. సిమెంట్ ధరలు కూడా పెరిగితే ఇళ్ల నిర్మాణ వ్యయం మరింత పెరిగే అవకాశం ఉంది. సిమెంట్ ధరల పెంపు అమల్లోకి వస్తే తెలుగు రాష్ట్రాల్లో మొత్తం ధరలు సుమారు 10 శాతం వరకు పెరిగే అవకాశం ఉందని మార్కెట్ వర్గాలు అంచనా వేస్తున్నాయి.
ముడిసరుకు ధరలు పెరగడం, ప్యాకేజింగ్ వ్యయాలు అధికం కావడం, రవాణా ఖర్చులు పెరగడం వంటి కారణాలతో సిమెంట్ ధరలను పెంచాలని కంపెనీలు నిర్ణయించినట్లు తెలుస్తోంది. ఈ పెంపు నిర్మాణ సంస్థలతో పాటు వ్యక్తిగతంగా ఇళ్లు నిర్మించుకునే వారిపైనా ప్రభావం చూపే అవకాశం ఉంది.
సిమెంట్ ధరల పెంపుతో నిర్మాణ రంగంపై అదనపు భారం పడుతుందనే ఆందోళన వ్యక్తమవుతోంది. ఇప్పటికే నిర్మాణ సామగ్రి ధరల కారణంగా బడ్జెట్ పెరుగుతున్న సమయంలో.. సిమెంట్ బస్తాపై మరో రూ.30 నుంచి రూ.40 వరకు పెరిగితే మొత్తం నిర్మాణ వ్యయం గణనీయంగా పెరిగే అవకాశం ఉంది.
అయితే కంపెనీలు ప్రకటించే తుది ధరలు, పెంపు ఎంతమేర అమల్లోకి వస్తుందనే దానిపై స్పష్టత రావాల్సి ఉంది. ధరల పెంపు నిజంగా అమల్లోకి వస్తే ఇల్లు నిర్మించుకోవాలనుకునే వారు తమ బడ్జెట్ను మరోసారి సమీక్షించుకోవాల్సిన పరిస్థితి ఏర్పడనుంది.
