ధాన్యం కొనుగోలు కేంద్రాలను వెంటనే ప్రారంభించాలి
నంగునూరును కరువు మండలంగా ప్రకటించాలి
లేదంటే పాదయాత్ర చేపడతాం
బీజేపీ కిసాన్ మోర్చా జిల్లా అధ్యక్ష, ఉపాధ్యక్షులు వల్లపు రెడ్డి రజినీకర్ రెడ్డి, పరకాల తిరుపతిరెడ్డి బీజేపీ మండల అధ్యక్షుడు చౌడుచర్ల వెంకట్ రామ్ రెడ్డి
ప్రతిపక్షం,నంగునూరు, అక్టోబరు 29: ఒకవైపు వర్షాల ముప్పుతో చేతికొచ్చిన ధాన్యం తడిసి పోతుందన్న ఆందోళన.. మరోవైపు సాగునీరు అందక ఎండిపోతున్న పంటలతో రైతుల అవస్థలు! సిద్దిపేట జిల్లాలో వెంటనే ధాన్యం కొనుగోలు కేంద్రాలను ప్రారంభించి, సాగునీటి సమస్యతో సతమతమవుతున్న నంగునూరు మండలాన్ని కరువు మండలంగా ప్రకటించాలని బీజేపీ కిసాన్ మోర్చా నాయకులు ప్రభుత్వాన్ని డిమాండ్ చేశారు. ప్రభుత్వం స్పందించకపోతే మండల వ్యాప్తంగా పాదయాత్ర చేపట్టి రైతుల దుస్థితిని అధికారులకు కళ్లకు కట్టినట్లు చూపిస్తామని హెచ్చరించారు. బీజేపీ కిసాన్ మోర్చా జిల్లా అధ్యక్ష,ఉపాధ్యక్షులు వల్లపు రెడ్డి రజనీకర్ రెడ్డి, పరకాల తిరుపతిరెడ్డి, బీజేపీ మండల అధ్యక్షుడు చౌడుచర్ల వెంకట్ రామ్ రెడ్డి గురువారం నంగునూరులో విలేకరులతో మాట్లాడారు.సిద్ధిపేట జిల్లా వ్యాప్తంగా ధాన్యం కొనుగోలు కేంద్రాలను తక్షణమే ప్రారంభించి రైతులను ఆదుకోవాలని ప్రభుత్వాన్ని డిమాండ్ చేశారు. సాగునీటి కొరతతో పంటలు ఎండిపోతున్న నేపథ్యంలో నంగునూరు మండలాన్ని కరువు మండలంగా ప్రకటించాలని కోరారు. ప్రభుత్వం, సంబంధిత అధికారులు వెంటనే స్పందించి రైతుల సమస్యలను పరిష్కరించకపోతే మండలంలో పాదయాత్ర చేపట్టి క్షేత్రస్థాయి పరిస్థితులను అధికారుల దృష్టికి తీసుకెళ్తామని హెచ్చరించారు.
వర్షాల భయంతో రైతుల ఆందోళన
జిల్లాలో ఇప్పటికే పలువురు రైతులు పంటలను కోసి ధాన్యాన్ని విక్రయించేందుకు సిద్ధంగా ఉన్నారని రజనీకర్ రెడ్డి, తిరుపతి రెడ్డి తెలిపారు. ఆర్నాబ్ తుఫాన్ ప్రభావంతో వాతావరణం మేఘావృతమై వర్షాలు కురిసే అవకాశాలు ఉండటంతో ధాన్యం తడిసి నాణ్యత దెబ్బతింటుందని రైతులు ఆందోళన చెందుతున్నారని పేర్కొన్నారు. కొనుగోలు కేంద్రాల ప్రారంభంలో జాప్యం జరగడం వల్ల రైతులు ఇబ్బందులు ఎదుర్కొంటున్నారని అన్నారు. ప్రభుత్వం తక్షణమే స్పందించి సిద్ధి జిల్లా వ్యాప్తంగా అన్ని గ్రామాల్లో ధాన్యం కొనుగోలు కేంద్రాలను ప్రారంభించాలని కోరారు. రైతులు పండించిన ధాన్యాన్ని సకాలంలో కొనుగోలు చేయాలని డిమాండ్ చేశారు. ప్రతికూల వాతావరణ పరిస్థితుల కారణంగా రైతులకు నష్టం కలగకుండా అవసరమైన ఏర్పాట్లు చేయాలని కోరారు.
కాలువల పనులు అసంపూర్తి.. ఎండుతున్న పంటలు
ఎల్‌నినో ప్రభావంతో ఆశించిన స్థాయిలో వర్షాలు కురవకపోవడం, రంగ నాయక సాగర్ కాలువల నిర్మాణ పనులు అసంపూర్తిగా ఉండటంతో నంగునూరు మండలంలోని రైతులు సాగునీటి సమస్యను ఎదుర్కొంటున్నారని ఆవేదన వ్యక్తం చేశారు. సాగునీరు అందక పంటలు ఎండి పోతుండటంతో రైతులు తీవ్ర ఆర్థిక ఇబ్బందులకు గురయ్యే పరిస్థితి నెలకొందని తెలిపారు. వ్యవసాయంపై ఆధారపడి జీవించే రైతులకు నష్టం వాటిల్లకుండా ప్రభుత్వం తక్షణమే స్పందించాలని, మండలంలో నెలకొన్న పరిస్థితులను అధికారులు క్షేత్రస్థాయిలో పరిశీలించాలని కోరారు. సాగునీటి సమస్యకు శాశ్వత పరిష్కారం చూపడంతోపాటు రైతులకు అవసరమైన సహాయ చర్యలు చేపట్టాలని డిమాండ్ చేశారు.
పాదయాత్ర చేపడతాం
నంగునూరు మండలంలో నెలకొన్న వ్యవసాయ పరిస్థితులను దృష్టిలో ఉంచుకొని మండలాన్ని కరువు మండలంగా ప్రకటించాలని ప్రభుత్వాన్ని కోరారు. రైతుల సమస్యలను పట్టించుకోకుండా అధికారులు నిర్లక్ష్యం వహిస్తే బీజేపీ ఆధ్వర్యంలో పాదయాత్ర చేపట్టి గ్రామాల్లో పంటలు ఎండిపోతున్న తీరును, రైతులు ఎదుర్కొంటున్న ఇబ్బందులను అధికారులకు ప్రత్యక్షంగా చూపిస్తామని హెచ్చరించారు.రైతుల సంక్షేమం కోసం ప్రభుత్వం తక్షణ చర్యలు తీసుకోవాలని డిమాండ్ చేశారు. ధాన్యం కొనుగోళ్లలో జాప్యాన్ని నివారించాలని విజ్ఞప్తి చేశారు. సాగునీటి సమస్యలను పరిష్కరించి పంటలను కాపాడాలని డిమాండ్ చేశారు. ఈ కార్యక్రమంలో కటుకూరు భూపాల్ రెడ్డి, కోల శ్రీకాంత్ గౌడ్, జీడిపల్లి రజనీకర్ రెడ్డి, మద్దూర్ శ్రీనివాస్ గౌడ్, సత్తిరెడ్డి, సతీశ్ గౌడ్, యాదగిరి, పోల్సాని కృష్ణ ప్రసాద్ తదితరులు పాల్గొన్నారు.
