- కాంగ్రెస్ శ్రేణులకు ఎమ్మెల్యే కవ్వంపల్లి పిలుపు
ప్రతిపక్షం, మానకొండూర్, సెప్టెంబర్ 26: రాష్ట్ర ముఖ్యమంత్రి ఎనుముల రేవంత్రెడ్డి ఈ నెల 30న చేపట్టనున్న కరీంనగర్, సిరిసిల్ల జిల్లాల పర్యటనను విజయవంతం చేయాలని టీపీసీసీ ఎస్సీ సెల్ చైర్మన్, మానకొండూర్ ఎమ్మెల్యే డాక్టర్ కవ్వంపల్లి సత్యనారాయణ కాంగ్రెస్ పార్టీ శ్రేణులకు పిలుపునిచ్చారు. సీఎం పర్యటనలో భాగంగా సిరిసిల్లలో నిర్వహించనున్న భారీ బహిరంగ సభకు మానకొండూర్ నియోజకవర్గం నుంచి పెద్ద సంఖ్యలో ప్రజలు, పార్టీ నాయకులు, కార్యకర్తలు తరలివచ్చేలా ఏర్పాట్లు చేయాలని సూచించారు.ఈ మేరకు శనివారం మానకొండూర్ నియోజకవర్గ పరిధిలోని వివిధ మండలాల కాంగ్రెస్ పార్టీ అధ్యక్షులు, ముఖ్య నాయకులతో ఎమ్మెల్యే కవ్వంపల్లి సత్యనారాయణ వీడియో కాన్ఫరెన్స్ నిర్వహించారు. ఈ సందర్భంగా సీఎం పర్యటనకు సంబంధించిన ఏర్పాట్లు, సభకు పార్టీ శ్రేణుల తరలింపు, మండలాల వారీగా సమన్వయం వంటి అంశాలపై నాయకులతో చర్చించారు.
నూతన కలెక్టరేట్ ప్రారంభం
ఈ నెల 30న కరీంనగర్ జిల్లా నూతన కలెక్టరేట్ భవనాన్ని ముఖ్యమంత్రి రేవంత్రెడ్డి ప్రారంభించనున్నారని ఎమ్మెల్యే తెలిపారు. అనంతరం సీఎం సిరిసిల్లకు వెళ్లి అక్కడ నిర్వహించే భారీ బహిరంగ సభలో పాల్గొంటారని పేర్కొన్నారు. సీఎం పర్యటనను పార్టీ అధిష్టానం ప్రతిష్టాత్మకంగా తీసుకున్న నేపథ్యంలో సభను విజయవంతం చేసేందుకు ప్రతి నాయకుడు, కార్యకర్త బాధ్యతగా పనిచేయాలని సూచించారు.
మండలాల వారీగా సమన్వయం
మానకొండూర్ నియోజకవర్గంలోని అన్ని మండలాల నుంచి పెద్ద సంఖ్యలో పార్టీ శ్రేణులు సభకు హాజరయ్యేలా ముందస్తు ప్రణాళికతో వ్యవహరించాలని ఎమ్మెల్యే కవ్వంపల్లి సూచించారు. కాంగ్రెస్ పార్టీ నాయకులు, కార్యకర్తలతో పాటు అన్ని విభాగాల నాయకులు, ఇందిరమ్మ ఇళ్ల లబ్ధిదారులు, మహిళా సంఘాల సభ్యులు, సర్పంచులు, స్థానిక సంస్థల ప్రజాప్రతినిధులు, మాజీ ప్రజాప్రతినిధులను సభకు తరలించేలా చర్యలు తీసుకోవాలని కోరారు.
ప్రతి మండలంలో నాయకులు పరస్పర సమన్వయంతో పనిచేస్తూ సభకు హాజరయ్యే వారి సంఖ్యపై ప్రత్యేక దృష్టి సారించాలని అన్నారు. సీఎం పర్యటన, సిరిసిల్ల బహిరంగ సభ విజయవంతం కావడంలో మానకొండూర్ నియోజకవర్గం నుంచి కాంగ్రెస్ శ్రేణుల భాగస్వామ్యం కీలకంగా ఉండాలని ఎమ్మెల్యే కవ్వంపల్లి సత్యనారాయణ పేర్కొన్నారు.
