ప్రతిపక్షం, సెప్టెంబర్ 05: ప్రతి ఏడాది సెప్టెంబర్ 5న దేశవ్యాప్తంగా ఉపాధ్యాయ దినోత్సవాన్ని ఘనంగా నిర్వహిస్తారు. పాఠశాలలు, కళాశాలల్లో ప్రత్యేక కార్యక్రమాలు ఏర్పాటు చేసి ఉపాధ్యాయులను సన్మానిస్తారు. విద్యార్థులు తమ గురువులకు శుభాకాంక్షలు తెలియజేస్తూ వారి సేవలను గుర్తు చేసుకుంటారు. అయితే సెప్టెంబర్ 5నే ఉపాధ్యాయ దినోత్సవంగా ఎందుకు జరుపుకుంటున్నారనే విషయం చాలామందికి తెలియదు. దీని వెనుక ప్రముఖ విద్యావేత్త, తత్వవేత్త, మాజీ రాష్ట్రపతి డాక్టర్ సర్వేపల్లి రాధాకృష్ణన్కు సంబంధించిన ఆసక్తికరమైన కథ ఉంది.
సర్వేపల్లి రాధాకృష్ణన్ 1888 సెప్టెంబర్ 5న జన్మించారు. ఆయన గొప్ప తత్వవేత్తగా, విద్యావేత్తగా దేశానికి విశేష సేవలు అందించారు. అనంతరం భారతదేశానికి రెండో రాష్ట్రపతిగా బాధ్యతలు చేపట్టారు. 1962లో ఆయన రాష్ట్రపతిగా బాధ్యతలు స్వీకరించిన సమయంలోనే ఆయన జన్మదినాన్ని పురస్కరించుకుని ఈ ప్రత్యేక దినోత్సవాన్ని నిర్వహించే ఆలోచనకు బీజం పడింది.
1962లో సర్వేపల్లి రాధాకృష్ణన్ జన్మదినం సందర్భంగా ఆయన సన్నిహితులు, విద్యార్థులు ప్రత్యేకంగా పుట్టినరోజు వేడుకలు నిర్వహించేందుకు అనుమతి కోరినట్లు చెబుతారు. అయితే తన పుట్టినరోజును వ్యక్తిగత వేడుకగా నిర్వహించడం కంటే.. దేశంలోని ఉపాధ్యాయులందరినీ గౌరవించే రోజుగా జరుపుకుంటే తనకు మరింత గర్వకారణంగా ఉంటుందని రాధాకృష్ణన్ సూచించారు.
తన జీవితంలో ఉపాధ్యాయ వృత్తికి, విద్యకు ఉన్న ప్రాధాన్యాన్ని గుర్తు చేస్తూ ఆయన చేసిన ఈ సూచనకు అప్పట్లో విశేష ప్రాధాన్యం లభించింది. దీంతో ఆయన జన్మదినమైన సెప్టెంబర్ 5ను ప్రత్యేకంగా ఉపాధ్యాయ దినోత్సవంగా నిర్వహించే సంప్రదాయం ప్రారంభమైంది. అప్పటి నుంచి ప్రతి ఏడాది సెప్టెంబర్ 5న దేశవ్యాప్తంగా టీచర్స్ డేను నిర్వహిస్తూ ఉపాధ్యాయుల సేవలను స్మరించుకుంటున్నారు.
విద్యార్థుల జీవితాలను సరైన దిశలో నడిపించడంలో ఉపాధ్యాయుల పాత్ర ఎంతో కీలకం. పాఠ్యాంశాలను బోధించడంతో పాటు విద్యార్థుల్లో క్రమశిక్షణ, విలువలు, బాధ్యత, ఆలోచనా విధానం వంటి లక్షణాలను పెంపొందించడంలో గురువులు కీలకంగా వ్యవహరిస్తారు. అందుకే ఉపాధ్యాయ దినోత్సవం కేవలం ఒక వేడుకగా కాకుండా.. విద్యార్థుల జీవితాలను తీర్చిదిద్దే ప్రతి గురువుకు కృతజ్ఞతలు తెలిపే ప్రత్యేక రోజుగా భావిస్తారు.
సర్వేపల్లి రాధాకృష్ణన్ తన పుట్టినరోజును వ్యక్తిగత వేడుకగా జరుపుకోవడం కంటే ఉపాధ్యాయులందరికీ అంకితం చేయాలనే ఆలోచన చేయడం వల్లే సెప్టెంబర్ 5కు ప్రత్యేక గుర్తింపు వచ్చింది. ఈ రోజున విద్యార్థులు తమ గురువులను స్మరించుకోవడం, వారి సేవలకు కృతజ్ఞతలు చెప్పడం ఆనవాయితీగా మారింది. అందుకే ప్రతి ఏడాది సెప్టెంబర్ 5 రాగానే దేశవ్యాప్తంగా పాఠశాలలు, కళాశాలల్లో గురువులకు గౌరవం తెలిపే కార్యక్రమాలు నిర్వహిస్తారు.
