ప్రతిపక్షం, సెప్టెంబర్ 05: యువతలో పెరుగుతున్న డ్రగ్స్ వ్యసనం, అధిక స్క్రీన్ టైమ్ వంటి అంశాలపై ఉపాధ్యాయులు అప్రమత్తంగా ఉండాలని ప్రధాని మోదీ సూచించారు. జాతీయ ఉపాధ్యాయ పురస్కారాలు అందుకున్న 82 మంది ఉపాధ్యాయులు ప్రధానితో భేటీ అయ్యారు. ఈ సందర్భంగా విద్యార్థుల భవిష్యత్తు, వారి ప్రవర్తనలో వస్తున్న మార్పులు, ఆరోగ్యకరమైన జీవనశైలిపై ఉపాధ్యాయులు ప్రత్యేక దృష్టి పెట్టాల్సిన అవసరం ఉందని ప్రధాని సూచించారు.
విద్యార్థుల ప్రవర్తనను ఎప్పటికప్పుడు గమనిస్తూ.. వారిలో ఏవైనా ప్రతికూల మార్పులు కనిపిస్తే వాటిని గుర్తించాలని మోదీ అన్నారు. ముఖ్యంగా యువత డ్రగ్స్ వంటి వ్యసనాలకు లోనుకాకుండా అవగాహన కల్పించాల్సిన బాధ్యత ఉపాధ్యాయులపై ఉందని పేర్కొన్నారు. విద్యార్థులతో స్నేహపూర్వకంగా మెలుగుతూ వారి సమస్యలను తెలుసుకునే ప్రయత్నం చేయాలని సూచించారు.
పిల్లలు చదువుతో పాటు క్రీడలు, సృజనాత్మక కార్యక్రమాల్లో పాల్గొనేలా ప్రోత్సహించాలని ప్రధాని అన్నారు. క్రీడలు, కళలు, ఇతర సృజనాత్మక కార్యకలాపాలు విద్యార్థుల్లో ఆత్మవిశ్వాసాన్ని పెంచడంతో పాటు వారి శారీరక, మానసిక వికాసానికి దోహదపడతాయని పేర్కొన్నారు. పాఠశాల స్థాయి నుంచే విద్యార్థులకు సమతుల్యమైన జీవన విధానంపై అవగాహన కల్పించాలని సూచించారు.
ఇక పిల్లల్లో పెరుగుతున్న అధిక స్క్రీన్ టైమ్ కూడా ఆందోళన కలిగిస్తోందని మోదీ పేర్కొన్నారు. మొబైల్ ఫోన్లు, ఇతర డిజిటల్ పరికరాల వినియోగాన్ని అవసరమైన మేరకే పరిమితం చేసేలా విద్యార్థులకు సూచనలు ఇవ్వాలని అన్నారు. ఈ విషయంలో ఉపాధ్యాయులు తల్లిదండ్రులతో కలిసి పనిచేయాలని సూచించారు. పిల్లలు ఎక్కువ సమయం మొబైల్ ఫోన్లకు పరిమితం కాకుండా క్రీడలు, పుస్తక పఠనం, సృజనాత్మక కార్యక్రమాలు, కుటుంబంతో గడిపే సమయానికి ప్రాధాన్యం ఇచ్చేలా ప్రోత్సహించాలని ప్రధాని తెలిపారు.
విద్యార్థుల విద్యా ప్రగతితో పాటు వారి వ్యక్తిత్వ వికాసం, ప్రవర్తన, ఆరోగ్యం వంటి అంశాలపైనా ఉపాధ్యాయులు దృష్టి పెట్టాలని మోదీ సూచించారు. పాఠశాలలు కేవలం విద్యను అందించే కేంద్రాలుగా కాకుండా.. విద్యార్థుల భవిష్యత్తును తీర్చిదిద్దే వేదికలుగా మారాలని ఆయన ఆకాంక్షించారు. జాతీయ ఉపాధ్యాయ పురస్కారాలు అందుకున్న ఉపాధ్యాయులతో జరిగిన భేటీలో ప్రధాని ఈ అంశాలపై ప్రత్యేకంగా దృష్టి సారించాలని సూచించారు.
