ప్రతిపక్షం, ఆగస్టు 02: తెలంగాణలో ఫీజు రీయింబర్స్మెంట్ పథకం అమలులో ప్రభుత్వం కీలక మార్పులకు శ్రీకారం చుట్టే దిశగా అడుగులు వేస్తోంది. విద్యార్థులకు సకాలంలో ఆర్థిక సహాయం అందించడంతో పాటు కళాశాలలకు ఫీజుల చెల్లింపుల్లో పారదర్శకత తీసుకురావాలనే లక్ష్యంతో డైరెక్ట్ బెనిఫిట్ ట్రాన్స్ఫర్ (డీబీటీ) విధానాన్ని అమలు చేయాలని ప్రభుత్వం యోచిస్తోంది. ఈ విధానం అమల్లోకి వస్తే ఫీజు రీయింబర్స్మెంట్ మొత్తాన్ని నేరుగా విద్యార్థుల బ్యాంకు ఖాతాల్లో జమ చేయనున్నట్లు సమాచారం.
ప్రభుత్వ ప్రతిపాదన ప్రకారం, ఒకేసారి మొత్తం చెల్లించే బదులుగా ఏడాదికి మూడు విడతల్లో ఫీజు రీయింబర్స్మెంట్ నిధులను విడుదల చేయనున్నారు. విద్యా సంవత్సరం ప్రారంభంలో తొలి విడత, మధ్యలో క్వార్టర్లీ ప్రాతిపదికన రెండో విడత, సెమిస్టర్ పరీక్షల సమయంలో మూడో విడతగా విద్యార్థుల ఖాతాల్లో నిధులు జమ చేసే విధానాన్ని పరిశీలిస్తున్నారు. దీంతో విద్యార్థులు ప్రతి దశలో అవసరమైన ఆర్థిక సహాయం పొందే అవకాశం ఉంటుంది.
ఇప్పటికే పేరుకుపోయిన సుమారు రూ.8 వేల కోట్ల ఫీజు రీయింబర్స్మెంట్ బకాయిలను కూడా విడతల వారీగా విడుదల చేసే ప్రణాళికపై ప్రభుత్వం కసరత్తు చేస్తున్నట్లు తెలుస్తోంది. బకాయిల చెల్లింపులతో పాటు ప్రస్తుత విద్యా సంవత్సరానికి సంబంధించిన నిధుల విడుదలను కూడా క్రమబద్ధీకరించాలనే లక్ష్యంతో ఈ విధానాన్ని రూపొందిస్తున్నట్లు అధికార వర్గాలు చెబుతున్నాయి.
విద్యార్థుల ఖాతాల్లో జమయ్యే నిధులు ఇతర అవసరాలకు వినియోగం కాకుండా ప్రత్యేక భద్రతా వ్యవస్థను కూడా ప్రభుత్వం ప్రతిపాదిస్తోంది. ఆటో డెబిట్ విధానం లేదా ఈ-రూపీ (e-RUPI) వోచర్ వ్యవస్థ ద్వారా విద్యార్థి ఖాతాలో జమ అయిన మొత్తం నేరుగా సంబంధిత కళాశాల ఖాతాకు బదిలీ అయ్యేలా నిబంధనలు తీసుకురావాలని యోచిస్తోంది. దీంతో నిధులు కేవలం విద్యా ఫీజుల చెల్లింపుకే వినియోగించబడతాయని అధికారులు భావిస్తున్నారు.
ఈ కొత్త విధానం అమల్లోకి వస్తే విద్యార్థులకు సమయానికి ఆర్థిక సహాయం అందడంతో పాటు కళాశాలలకు ఫీజుల చెల్లింపులో జాప్యం తగ్గే అవకాశం ఉంది. అదే సమయంలో ప్రభుత్వ నిధుల వినియోగంలో పారదర్శకత, జవాబుదారీతనం కూడా పెరుగుతుందని విద్యాశాఖ అధికారులు అంచనా వేస్తున్నారు.
అయితే, ఈ మార్పులకు సంబంధించి ప్రభుత్వం నుంచి తుది మార్గదర్శకాలు, అధికారిక ఉత్తర్వులు వెలువడాల్సి ఉంది. విధానానికి ఆమోదం లభించిన అనంతరం అమలు షెడ్యూల్, అర్హత ప్రమాణాలు, చెల్లింపుల విధానం వంటి పూర్తి వివరాలను ప్రభుత్వం ప్రకటించనుంది.
