ప్రతిపక్షం, ఆగస్టు 09: విశాఖపట్నంలోని ద్వారకానగర్లో శ్రీ నేరెళ్ల రమేష్కు చెందిన స్వరరాగం స్టూడియోలో ప్రముఖ గాయకుడు శ్రీ రామ్ కుమార్ ఆధ్వర్యంలో నిర్వహించిన హిందీ, తెలుగు పాటల బొనాంజా కార్యక్రమం సంగీతాభిమానులను విశేషంగా అలరించింది. నిర్వాహకులు కోటీశ్వరరావు, వి.వి.ఎన్. మూర్తి, పద్మజా ప్రియదర్శిని సమన్వయంతో కార్యక్రమాన్ని ఘనంగా నిర్వహించారు.
ఈ సందర్భంగా గాయకుడు శ్రీ రామ్ కుమార్ తన గాత్రంతో దిగ్గజ గాయకులు కిషోర్ కుమార్, మహ్మద్ రఫీ, ముఖేష్, శైలేంద్ర సింగ్, ఎస్.పి. బాలసుబ్రహ్మణ్యం, ఘంటసాల, పి.బి. శ్రీనివాస్, ఎ.ఎం. రాజా తదితరులు ఆలపించిన పలు మధుర గీతాలను పాడి ప్రేక్షకులను మంత్రముగ్ధులను చేశారు. కార్యక్రమాన్ని ప్రత్యక్షంగా వీక్షించిన వారితో పాటు ప్రపంచవ్యాప్తంగా యూట్యూబ్ ద్వారా వీక్షించిన సంగీతాభిమానులు సైతం ఆయన గానానికి విశేషంగా స్పందించారు.
యుగళ గీతాల్లో లీలారాణి, రేణుక, ఆదిలక్ష్మి, శ్రీమతి కృష్ణశ్రీ, నారీమణి, రాంబాబు తమ గాత్ర సహకారాన్ని అందించి ప్రేక్షకులను అలరించారు. ముఖ్యంగా శ్రీ రామ్ కుమార్ ఆలపించిన మధుర గీతాల సమాహారాలు కార్యక్రమానికి ప్రత్యేక ఆకర్షణగా నిలిచాయి.
ఆయన ఆలపించిన ‘ఆజా శామ్ హోనే ఆయీ’, ‘ఏ దోస్తీ’, ‘ఏ దిల్ నా హోతా బేచారా’, ‘ఆధా హై చంద్రమా’, ‘మేరా జూతా హై జపానీ’, ‘మే షాయర్ తో నహీ’, ‘జానే మన్ జానే మన్’ వంటి పాటలకు ప్రేక్షకుల నుంచి విశేష స్పందన లభించింది. ప్రతి గీతానికి చప్పట్లతో అభినందనలు తెలుపుతూ సంగీతాభిమానులు కార్యక్రమాన్ని ఆస్వాదించారు.
కార్యక్రమానికి వ్యాఖ్యాతగా శ్యామ్ సుందర్ వ్యవహరించారు. తన వ్యాఖ్యానంతో పాటల మధ్య కార్యక్రమాన్ని రసవత్తరంగా కొనసాగిస్తూ ప్రేక్షకులను ఆకట్టుకున్నారు.
కార్యక్రమం అనంతరం శ్రీ రామ్ కుమార్, ఆయన సతీమణి సునీతలను నిర్వాహకులు ఘనంగా సత్కరించారు. ఈ కార్యక్రమంలో శ్రీ రామ్ కుమార్ కుమారుడు, కోడలు, మనవడు, మనుమరాలు తదితర కుటుంబ సభ్యులతో పాటు పెద్ద సంఖ్యలో సంగీతాభిమానులు, ప్రేక్షకులు పాల్గొన్నారు.
విభిన్న తరాల మధుర గీతాలను ఒకే వేదికపై వినిపించిన ఈ హిందీ, తెలుగు పాటల బొనాంజా కార్యక్రమం విశాఖపట్నం సంగీతాభిమానులకు ప్రత్యేక అనుభూతిని అందించింది. సంగీత సౌరభాన్ని పంచిన ఈ కార్యక్రమం నగర సంగీతాభిమానుల మదిలో చిరస్మరణీయంగా నిలిచిందని నిర్వాహకులు తెలిపారు.
