ప్రతిపక్షం, ఆగస్టు 21: దేశంలో ఏటా కోట్లాది మంది విద్యార్థులు డిగ్రీలు పూర్తి చేస్తున్నప్పటికీ.. అందులో అతి కొద్దిమందికే తమ విద్యార్హతకు తగిన ఉద్యోగాలు లభిస్తున్నాయని నీతి ఆయోగ్ వెల్లడించింది. దేశంలో కేవలం 8.25 శాతం మంది మాత్రమే తమ అర్హతకు సరిపోయే ఉద్యోగాలు సాధిస్తున్నారని పేర్కొంది. డిగ్రీ పట్టా ఉండటం ఒక్కటే ఉద్యోగానికి సరిపోదని, ప్రాక్టికల్ నాలెడ్జ్, సాంకేతిక నైపుణ్యాలు, పని అనుభవం వంటి అంశాలు ఎంతో కీలకమని తెలిపింది.
ప్రస్తుతం ఉద్యోగ మార్కెట్లో సంస్థలు కేవలం విద్యార్హతలకే ప్రాధాన్యం ఇవ్వడం లేదని నీతి ఆయోగ్ అభిప్రాయపడింది. అభ్యర్థుల్లో సమస్యలను పరిష్కరించే సామర్థ్యం, కమ్యూనికేషన్ నైపుణ్యాలు, సాంకేతిక పరిజ్ఞానం, ప్రాక్టికల్ అనుభవం వంటి అంశాలను కూడా పరిశీలిస్తున్నాయని పేర్కొంది. విద్యార్థులు చదువుతో పాటు పరిశ్రమలకు అవసరమైన నైపుణ్యాలను అభివృద్ధి చేసుకోవాల్సిన అవసరం ఉందని సూచించింది.
మరోవైపు ప్రభుత్వ ఉద్యోగాల కోసం పోటీ ఏ స్థాయిలో ఉందో గణాంకాలు స్పష్టం చేస్తున్నాయి. 2024 నవంబర్ నుంచి 2025 జులై మధ్య కాలంలో కేవలం 55 వేల ప్రభుత్వ ఉద్యోగాల కోసం ఏకంగా 1.86 కోట్ల దరఖాస్తులు వచ్చినట్లు నీతి ఆయోగ్ వెల్లడించింది. దీంతో ప్రభుత్వ ఉద్యోగాలపై యువతలో ఉన్న భారీ పోటీ పరిస్థితి అర్థమవుతోంది.
ఈ నేపథ్యంలో విద్యార్థులు కేవలం డిగ్రీ పూర్తి చేయడమే లక్ష్యంగా కాకుండా.. తమకు ఆసక్తి ఉన్న రంగంలో ప్రత్యేక నైపుణ్యాలను పెంచుకోవాలని నిపుణులు సూచిస్తున్నారు. చదువుతో పాటు ఇంటర్న్షిప్లు, ప్రాజెక్టులు, పరిశ్రమకు సంబంధించిన శిక్షణ, ప్రాక్టికల్ అనుభవంపై దృష్టి పెట్టడం ద్వారా ఉద్యోగ అవకాశాలను మెరుగుపరుచుకోవచ్చని చెబుతున్నారు.
ప్రస్తుత పోటీ ప్రపంచంలో డిగ్రీకి తోడు నైపుణ్యం ఉంటేనే ఉద్యోగ మార్కెట్లో మంచి అవకాశాలు దక్కుతాయని నీతి ఆయోగ్ నివేదిక సూచిస్తోంది. యువత తమ కెరీర్ లక్ష్యాలకు అనుగుణంగా నైపుణ్యాలను పెంచుకోవడం ద్వారా ఉద్యోగ అవకాశాలను అందిపుచ్చుకోవాలని సూచించింది.
