ప్రతిపక్షం, ఆగస్టు 24: తెలంగాణలో విషాదకర ఘటన చోటుచేసుకుంది. ఏడు నెలల క్రితం తల్లిదండ్రులను హత్య చేసిన కేసులో జైలుకు వెళ్లిన ఓ యువతి.. బెయిల్పై బయటకు వచ్చిన కొద్ది రోజులకే ఆత్మహత్యకు పాల్పడింది. సంగారెడ్డిలో చోటుచేసుకున్న ఈ ఘటన స్థానికంగా తీవ్ర కలకలం రేపింది. తల్లిదండ్రులను హత్య చేసిన విధంగానే మత్తు ఇంజెక్షన్ తీసుకుని యువతి ప్రాణాలు తీసుకున్నట్లు ప్రాథమికంగా తెలుస్తోంది.
సంగారెడ్డిలో నర్సుగా పనిచేస్తున్న 25 ఏళ్ల సురేఖ.. ఏడు నెలల క్రితం తన తల్లిదండ్రులు దశరథ, లక్ష్మినిలను హత్య చేసినట్లు కేసు నమోదైంది. తన ప్రియుడితో వివాహానికి తల్లిదండ్రులు అంగీకరించకపోవడంతో వారిపై తీవ్ర ఆగ్రహానికి గురైన సురేఖ.. మత్తు ఇంజెక్షన్ ఇచ్చి ఇద్దరినీ హత్య చేసినట్లు అప్పట్లో పోలీసులు గుర్తించారు. ఘటన అనంతరం ఆమెను అరెస్ట్ చేసి జైలుకు తరలించారు.
కొంతకాలం జైలులో ఉన్న సురేఖ ఇటీవల బెయిల్పై బయటకు వచ్చింది. అనంతరం సంగారెడ్డిలోని ఓ హాస్టల్లో ఉంటూ నర్సుగా పనిచేస్తున్నట్లు సమాచారం. అయితే తల్లిదండ్రుల హత్య కేసు, జైలు జీవితం, తదనంతర పరిణామాల కారణంగా ఆమె మానసికంగా తీవ్ర ఒత్తిడికి గురై ఉండవచ్చని పోలీసులు భావిస్తున్నారు.
ఈ క్రమంలోనే నిన్న హాస్టల్లో సురేఖ మత్తు ఇంజెక్షన్ తీసుకున్నట్లు తెలుస్తోంది. కొంతసేపటి తర్వాత ఆమె అపస్మారక స్థితిలో ఉండటాన్ని గుర్తించిన హాస్టల్ సిబ్బంది వెంటనే పోలీసులకు సమాచారం అందించారు. ఆమెను ఆస్పత్రికి తరలించినప్పటికీ అప్పటికే మృతి చెందినట్లు వైద్యులు నిర్ధారించినట్లు సమాచారం.
తల్లిదండ్రులను హత్య చేసిన కేసులో బెయిల్పై బయటకు వచ్చిన యువతి.. అదే తరహాలో మత్తు ఇంజెక్షన్ తీసుకుని ఆత్మహత్య చేసుకోవడం ఇప్పుడు చర్చనీయాంశంగా మారింది. ఘటనపై పోలీసులు కేసు నమోదు చేసి దర్యాప్తు చేస్తున్నారు. సురేఖ ఆత్మహత్యకు దారితీసిన కారణాలు, ఆమె చివరి రోజుల్లో ఎవరితో మాట్లాడింది, ఏమైనా సందేశాలు పంపిందా వంటి అంశాలను పోలీసులు పరిశీలిస్తున్నారు.
హాస్టల్లోని పరిసరాలు, సీసీ కెమెరాల దృశ్యాలు, ఆమెకు సంబంధించిన ఫోన్ వివరాలను పోలీసులు పరిశీలిస్తున్నట్లు తెలుస్తోంది. మృతదేహాన్ని పోస్టుమార్టం నిమిత్తం ఆస్పత్రికి తరలించి, అనంతరం కుటుంబ సభ్యులకు అప్పగించేందుకు చర్యలు చేపట్టారు. తల్లిదండ్రుల హత్య కేసు దర్యాప్తు కొనసాగుతున్న సమయంలోనే సురేఖ ఆత్మహత్య చేసుకోవడంతో ఈ ఘటనకు సంబంధించిన పూర్తి వివరాలను పోలీసులు సేకరిస్తున్నారు.
