ప్రతిపక్షం, ఆగస్టు 02: విపత్తు సమయంలో మానవత్వమే అతిపెద్ద బలం అని మరోసారి నిరూపించిన ఘటన అస్సాంలో చోటుచేసుకుంది. ఎలాంటి అధికార హోదా లేకపోయినా, ప్రత్యేక శిక్షణ లేకపోయినా, వరదల్లో చిక్కుకున్న వేలాది మంది ప్రాణాలను కాపాడేందుకు తన ప్రాణాలను సైతం పణంగా పెట్టిన 25 ఏళ్ల యువకుడు ఇప్పుడు దేశవ్యాప్తంగా ప్రశంసలు అందుకుంటున్నాడు. అస్సాంకు చెందిన శ్రవణ్ అనే యువకుడు వరద ప్రభావిత ప్రాంతాల్లో సుమారు 2 వేల మందిని సురక్షిత ప్రాంతాలకు తరలించి నిజమైన హీరోగా నిలిచాడు.
శ్రవణ్ జీవితం కూడా ఎంతో సాధారణమే. పదో తరగతి కూడా పూర్తి చేయని ఆయన, నదిలో కొట్టుకొచ్చే కలపను ఏరుకుని విక్రయిస్తూ కుటుంబాన్ని పోషించుకుంటున్నాడు. అయితే ప్రకృతి విపత్తు సంభవించిన సమయంలో తన జీవనోపాధిని పక్కనబెట్టి, వరదల్లో చిక్కుకున్న ప్రజలను రక్షించేందుకు ముందుకొచ్చాడు.
భారీ వర్షాలతో అస్సాంలోని పలు ప్రాంతాలు నీటమునిగిపోగా, అనేక గ్రామాలు ప్రపంచంతో సంబంధాలు కోల్పోయాయి. అలాంటి క్లిష్ట పరిస్థితుల్లో శ్రవణ్ స్థానిక వాలంటీర్లతో కలిసి పడవల సహాయంతో సహాయక చర్యలు చేపట్టాడు. ముఖ్యంగా రహదారి సౌకర్యం లేని ఐదు మారుమూల గ్రామాల్లో చిక్కుకున్న ప్రజలను బయటకు తీసుకురావడంలో కీలక పాత్ర పోషించాడు.
గర్భిణులు, వృద్ధులు, చిన్నారులు, అనారోగ్యంతో బాధపడుతున్న రోగులను అత్యంత జాగ్రత్తగా సురక్షిత ప్రాంతాలకు తరలించినట్లు స్థానికులు తెలిపారు. ఎలాంటి ఆధునిక రెస్క్యూ పరికరాలు లేకపోయినా, పరిస్థితులకు తగ్గట్టుగా ధైర్యంగా వ్యవహరించి వందలాది కుటుంబాలకు ఆశాకిరణంగా మారాడు.
శ్రవణ్ చేసిన సేవలను స్థానిక ప్రజలు, స్వచ్ఛంద సంస్థలు, సామాజిక మాధ్యమాల వినియోగదారులు ప్రశంసిస్తున్నారు. “నిజమైన హీరోలు సినిమాల్లో మాత్రమే కాదు.. సమాజంలో కూడా ఉంటారు” అంటూ నెటిజన్లు ఆయన సేవలను కొనియాడుతున్నారు.
విపత్తు సమయంలో స్వార్థాన్ని పక్కనబెట్టి మానవత్వాన్ని చాటిన శ్రవణ్ వంటి యువకులు సమాజానికి ఆదర్శంగా నిలుస్తారని పలువురు అభిప్రాయపడుతున్నారు. ప్రాణాలను లెక్కచేయకుండా వేలాది మందికి అండగా నిలిచిన ఆయన సేవలు అస్సాం ప్రజల హృదయాల్లో చిరస్థాయిగా నిలిచిపోతాయని స్థానికులు పేర్కొంటున్నారు.
