ప్రతిపక్షం, జూలై 28: తిరుమల శ్రీవారి దర్శనానికి భక్తుల రద్దీ కొనసాగుతోంది. శ్రీవారి సర్వదర్శనం కోసం తిరుమలకు చేరుకుంటున్న భక్తుల సంఖ్య పెరగడంతో వేచి ఉండాల్సిన సమయం కూడా అధికమైంది. తిరుమల తిరుపతి దేవస్థానం (టీటీడీ) వెల్లడించిన వివరాల ప్రకారం, ప్రస్తుతం వైకుంఠం క్యూ కాంప్లెక్స్లో 27 కంపార్ట్మెంట్లు భక్తులతో నిండిపోయాయి.
ప్రత్యేక ప్రవేశ దర్శన టోకెన్లు (ఎస్ఎస్డీ టోకెన్లు) లేని భక్తులు సర్వదర్శనం కోసం 12 నుంచి 15 గంటల వరకు వేచి ఉండాల్సి వస్తోంది. దర్శనానికి వచ్చే భక్తులు ఈ విషయాన్ని దృష్టిలో ఉంచుకుని ప్రయాణ ప్రణాళికలు సిద్ధం చేసుకోవాలని అధికారులు సూచిస్తున్నారు.
నిన్న ఒక్కరోజే 80,003 మంది భక్తులు శ్రీవారిని దర్శించుకోగా, హుండీ ద్వారా రూ.4.59 కోట్ల ఆదాయం సమకూరినట్లు టీటీడీ వెల్లడించింది. మరోవైపు, అంతకుముందు రోజు 90,012 మంది భక్తులు శ్రీవారిని దర్శించుకున్నట్లు అధికారులు తెలిపారు.
భక్తుల రద్దీ దృష్ట్యా దర్శన ఏర్పాట్లు, తాగునీరు, ప్రసాదాల పంపిణీ, క్యూ నిర్వహణ వంటి అంశాల్లో అన్ని చర్యలు చేపట్టినట్లు టీటీడీ అధికారులు పేర్కొన్నారు. భక్తులు సహనంతో అధికారులకు సహకరించాలని విజ్ఞప్తి చేశారు.
