ప్రతిపక్షం, ఆగస్టు 03: భారత్ రాష్ట్ర సమితి (బీఆర్ఎస్)లో నెలకొన్న అంతర్గత పరిణామాలపై ఆ పార్టీ వర్కింగ్ ప్రెసిడెంట్ కేటీఆర్ కీలక వ్యాఖ్యలు చేశారు. తన సోదరి, ఎమ్మెల్సీ కల్వకుంట్ల కవిత తీసుకున్న రాజకీయ వైఖరిపై స్పందిస్తూ, పార్టీ అధినేత కే. చంద్రశేఖర్రావు (కేసీఆర్)పై విమర్శలు చేయడం సరైన పద్ధతి కాదని అన్నారు.
ఇండియన్ ఎక్స్ప్రెస్ నిర్వహించిన ఓ కార్యక్రమంలో పాల్గొన్న కేటీఆర్ మాట్లాడుతూ, కవిత తనకు నచ్చిన మార్గాన్ని ఎంచుకున్నారని పేర్కొన్నారు. అయితే ఆమెకు పార్టీ ఎన్నో అవకాశాలు కల్పించిందని, ఎంపీగా, ఎమ్మెల్సీగా పనిచేసే అవకాశం ఇచ్చిందని గుర్తు చేశారు.
కేసీఆర్ తెలంగాణ రాష్ట్ర సాధన కోసం తన జీవితాన్ని అంకితం చేశారని, అలాంటి నాయకుడిపై బహిరంగంగా విమర్శలు చేయడం బాధాకరమని కేటీఆర్ అన్నారు. “పార్టీ అధినేతపై దాడి చేయాలనుకుంటే మీకు, రాజకీయ ప్రత్యర్థులకు తేడా ఏముంటుంది?” అని ప్రశ్నించారు.
పార్టీ నుంచి తగిన గుర్తింపు, బాధ్యతలు లభించిన తర్వాత కూడా కృతజ్ఞత లేకుండా అధినేతనే విమర్శించడం సరికాదని ఆయన వ్యాఖ్యానించారు. “అన్ని అవకాశాలు ఇచ్చినా పార్టీ నాయకత్వాన్నే విమర్శిస్తానంటే… అది వారి వ్యక్తిగత నిర్ణయం. అలానే కానివ్వండి” అంటూ కేటీఆర్ తన అభిప్రాయాన్ని వెల్లడించారు.
కేటీఆర్ చేసిన ఈ వ్యాఖ్యలు తెలంగాణ రాజకీయాల్లో చర్చనీయాంశంగా మారాయి. ఇటీవల బీఆర్ఎస్లో చోటుచేసుకుంటున్న పరిణామాల నేపథ్యంలో పార్టీ అంతర్గత పరిస్థితులపై మరోసారి చర్చ మొదలైంది.
అయితే, కేటీఆర్ వ్యాఖ్యలపై ఎమ్మెల్సీ కవిత నుంచి ఇప్పటివరకు ఎలాంటి అధికారిక స్పందన వెలువడలేదు. ఈ అంశంపై పార్టీ వర్గాల్లోనూ ఆసక్తికర చర్చ కొనసాగుతోంది.
