ప్రతిపక్షం, ఆగస్టు 03: సూపర్ స్టార్ మహేశ్ బాబు, బాలీవుడ్ నటి ప్రియాంకా చోప్రా ప్రధాన పాత్రల్లో దర్శకధీరుడు ఎస్.ఎస్. రాజమౌళి తెరకెక్కిస్తున్న ప్రతిష్ఠాత్మక చిత్రం ‘వారణాసి’ షూటింగ్ చివరి దశకు చేరుకుంది. సినిమా చిత్రీకరణ ఇప్పటికే 80 శాతం పూర్తైందని, మిగిలిన పనులను వేగంగా పూర్తి చేస్తున్నట్లు రాజమౌళి వెల్లడించారు.
సినిమాకు సంబంధించిన ప్రధాన యాక్షన్ సన్నివేశాల చిత్రీకరణ విజయవంతంగా పూర్తయిందని ఆయన తెలిపారు. ప్రస్తుతం కొన్ని కీలక సన్నివేశాలు, ప్యాచ్వర్క్ షూట్ మాత్రమే మిగిలి ఉందని, అవి కూడా త్వరలో పూర్తి చేయనున్నట్లు చెప్పారు. ప్రణాళిక ప్రకారం అక్టోబర్ నెలాఖరుకల్లా మొత్తం షూటింగ్ను పూర్తి చేయాలని లక్ష్యంగా పెట్టుకున్నామని వెల్లడించారు.
చిత్రీకరణతో పాటు పోస్ట్ ప్రొడక్షన్ పనులు కూడా సమాంతరంగా కొనసాగుతున్నాయని రాజమౌళి తెలిపారు. ఎడిటింగ్, విజువల్ ఎఫెక్ట్స్, బ్యాక్గ్రౌండ్ స్కోర్ తదితర విభాగాల్లో బృందం ఇప్పటికే పనులు ప్రారంభించిందని చెప్పారు. షూటింగ్ పూర్తయ్యే సమయానికి పోస్ట్ ప్రొడక్షన్లో కూడా గణనీయమైన పురోగతి సాధించాలని చిత్రబృందం భావిస్తోంది.
భారీ బడ్జెట్తో అంతర్జాతీయ ప్రమాణాల్లో రూపొందుతున్న ఈ చిత్రంపై దేశవ్యాప్తంగా సినీ అభిమానుల్లో భారీ అంచనాలు నెలకొన్నాయి. మహేశ్ బాబు–రాజమౌళి కాంబినేషన్లో వస్తున్న తొలి చిత్రం కావడంతో ప్రేక్షకుల్లో ప్రత్యేక ఆసక్తి కనిపిస్తోంది. ప్రియాంకా చోప్రా కీలక పాత్రలో నటిస్తుండటంతో ఈ సినిమాకు అంతర్జాతీయ స్థాయిలో కూడా గుర్తింపు లభిస్తోంది.
అత్యాధునిక సాంకేతిక పరిజ్ఞానం, భారీ యాక్షన్ సన్నివేశాలు, విజువల్ గ్రాండియర్తో రూపొందుతున్న ఈ చిత్రాన్ని వచ్చే ఏడాది ఏప్రిల్ 7న ప్రపంచవ్యాప్తంగా విడుదల చేయనున్నట్లు చిత్రబృందం ఇప్పటికే ప్రకటించింది. షూటింగ్ తుది దశకు చేరుకోవడంతో సినిమా విడుదలపై అభిమానుల్లో మరింత ఉత్సాహం నెలకొంది.
