*ఎల్ నినో ఎఫెక్ట్ తో రైతుల ఆవేదన. భారం మోపుతున్న పశుగ్రాసం ధరలు
*వర్షాభావంతో ఎండిపోయిన పంటలు – పశువులకు మేత లేక అల్లాడుతున్న రైతన్నలు.
*ఒక కట్ట వరి గడ్డి రూ.100 – ట్రాక్టర్ గడ్డికి రూ.15,000 వరకు ఖర్చు
*ట్రాక్టర్లలో గడ్డిని తరలిస్తున్న రైతులు – ప్రభుత్వం ఆదుకోవాలని వేడుకోలు.
ప్రతి పక్షం మర్రిగూడ అక్టోబర్ 23: నల్లగొండ జిల్లా మర్రిగూడ మండలంలో ఎల్ నినో ప్రభావం తీవ్రంగా కనిపిస్తోంది. వర్షాభావ పరిస్థితులతో పంటలు ఎండిపోవడమే కాకుండా, ఇప్పుడు పశుగ్రాసం కొరత కూడా తీవ్రంగా ఏర్పడింది.
మర్రిగూడ మండలంలో ఈ ఏడాది సరైన వర్షాలు లేకపోవడంతో పంటలు ఎండిపోయి రైతులు తీవ్ర ఇబ్బందులు పడుతున్నారు. పంట నష్టంతో ఇప్పటికే అప్పుల ఊబిలో కూరుకుపోయిన రైతులకు ఇప్పుడు పశువుల మేత కూడా దొరకకపోవడంతో మరింత కష్టంగా మారింది.
పశువులకు పశుగ్రాసం కొరత ఏర్పడటంతో రైతులు పక్క మండలాల నుండి వరి గడ్డిని కొనుగోలు చేసి ట్రాక్టర్లలో తరలిస్తున్నారు. ఫోటోలో కనిపిస్తున్నట్లుగా ట్రాక్టర్లపై ఎత్తుగా వరి గడ్డి కట్టలను వేసుకుని తీసుకువస్తున్నారు.
రైతులు ఆవేదన వ్యక్తం చేస్తూ… “ఒక కట్ట వరి గడ్డి రూ.100 చొప్పున అమ్ముతున్నారు. ఒక ట్రాక్టర్ గడ్డి తీసుకురావాలంటే రూ. 15,000 వరకు ఖర్చు అవుతోంది. పంటలు లేక ఆదాయం లేకపోయినా పశువుల కోసం అప్పు చేసి మరీ గడ్డి కొనాల్సి వస్తోంది” అని వాపోతున్నారు.
వర్షాలు లేక గ్రామాల్లో భూగర్భ జలాలు అడుగంటడం, పచ్చగడ్డి లేకపోవడంతో ఈ పరిస్థితి నెలకొందని, ప్రభుత్వం వెంటనే స్పందించి పశుగ్రాసాన్ని సబ్సిడీపై అందించి రైతులను ఆదుకోవాలని వారు కోరుతున్నారు.
