బంగారం కొనుగోళ్లు తగ్గించమని కోరినందుకే ధరలు దిగొచ్చాయి: మోదీ

ప్రతిపక్షం, నవంబర్ 21: బంగారం ధరలు తగ్గడంపై ప్రధానమంత్రి నరేంద్ర మోదీ కీలక వ్యాఖ్యలు చేశారు. ఏడాది క్రితం బంగారం కొనుగోళ్లను తగ్గించాలని తాను ప్రజలకు విజ్ఞప్తి చేశానని, ప్రజలు తన సూచనకు సానుకూలంగా స్పందించి అనవసర కొనుగోళ్లకు దూరంగా ఉండటంతో బంగారం ధరలు తగ్గుముఖం పట్టాయని ఆయన పేర్కొన్నారు. ఉత్తరప్రదేశ్‌లో నిర్వహించిన బహిరంగ సభలో మాట్లాడుతూ ఈ విషయాలను ప్రస్తావించారు. దేశ ఆర్థిక ప్రయోజనాలను దృష్టిలో పెట్టుకొని ప్రజలు తమ కొనుగోళ్ల విషయంలో బాధ్యతాయుతంగా వ్యవహరించారని ప్రశంసించారు.

గతంలో దేశంలో ఆహార కొరత ఏర్పడిన సమయంలో అప్పటి ప్రధానమంత్రి లాల్ బహదూర్ శాస్త్రి కూడా ప్రజలకు ఇలాంటి విజ్ఞప్తి చేశారని మోదీ గుర్తుచేశారు. ఆహార ధాన్యాల కొరతను అధిగమించేందుకు ప్రజలు వారానికి ఒక పూట భోజనం మానుకోవాలని ఆయన కోరగా, దేశ ప్రజలు ఆ పిలుపునకు స్పందించి సహకరించారని తెలిపారు. ఇప్పుడు తాను కూడా ఒక సామాన్య వ్యక్తిగా బంగారం కొనుగోళ్లను తగ్గించాలని కోరినప్పుడు ప్రజలు తన మాటను పాటించారని అన్నారు.

తన సూచన వల్ల తమ డబ్బు ఆదా అయిందని పలువురు ప్రజలు చెబుతున్నారని మోదీ వెల్లడించారు. దేశ ప్రయోజనాల కోసం ప్రజలు చేసే చిన్న చిన్న పొదుపు చర్యలు కూడా ఆర్థిక వ్యవస్థకు తోడ్పడతాయని ఆయన అభిప్రాయపడ్డారు. ప్రజల భాగస్వామ్యం, సహకారం దేశ అభివృద్ధిలో కీలకమని పేర్కొంటూ ఉత్తరప్రదేశ్ సభలో ఈ వ్యాఖ్యలు చేశారు.

Related News

Latest News