ప్రతిపక్షం, నవంబర్ 21: ప్రభుత్వ ఉద్యోగాలు ఇప్పిస్తామంటూ ఐటీ శాఖ మంత్రి ఓఎస్డీ పేరుతో నిరుద్యోగ యువతను మోసం చేసి రూ.50.87 లక్షలు వసూలు చేసిన ఘటన వెలుగులోకి వచ్చింది. నకిలీ ఓఎస్డీ ఐడీ కార్డులు, ప్రభుత్వ నియామక ఉత్తర్వులు, ప్రభుత్వ వెబ్సైట్లను పోలిన నకిలీ పోర్టల్స్ సృష్టించి పలువురిని నమ్మించినట్లు పోలీసులు గుర్తించారు. టీచర్, మున్సిపల్ అటెండర్, ఫుడ్ సేఫ్టీ ఆఫీసర్, రికార్డ్ అసిస్టెంట్ వంటి ప్రభుత్వ ఉద్యోగాలు ఇప్పిస్తామని ఆశ చూపి నిరుద్యోగుల నుంచి భారీగా డబ్బులు వసూలు చేశారు. బాధితులు డబ్బులు ఇచ్చి చాలా కాలం ఎదురుచూసినా ఉద్యోగాలు రాకపోవడంతో మోసపోయామని గ్రహించి మంత్రి కార్యాలయాన్ని ఆశ్రయించారు. దీంతో ఈ వ్యవహారం వెలుగులోకి వచ్చింది.
పోలీసుల విచారణలో ఈ మోసానికి పాల్పడిన ప్రధాన నిందితుడిగా హైదరాబాద్ రామంతపూర్కు చెందిన రవికిరణ్ను గుర్తించారు. అతడితో పాటు మీ సేవ కేంద్రం నిర్వాహకుడు గుంటూరు రవికుమార్ కూడా ఈ వ్యవహారంలో కీలక పాత్ర పోషించినట్లు వెల్లడైంది. వీరిద్దరూ కలిసి ప్రభుత్వ ఉద్యోగాల కోసం ప్రయత్నిస్తున్న నిరుద్యోగులను లక్ష్యంగా చేసుకుని మోసాలకు పాల్పడినట్లు పోలీసులు తెలిపారు. ప్రభుత్వ శాఖల్లో తమకు పరిచయాలు ఉన్నాయని, మంత్రి కార్యాలయంలో ఉన్నతాధికారులతో సంబంధాలు ఉన్నాయని నమ్మించి ఉద్యోగాలు ఇప్పిస్తామని హామీ ఇచ్చినట్లు సమాచారం.
నిందితులు తెలంగాణ ప్రభుత్వ పేరుతో నకిలీ నియామక పత్రాలు తయారు చేయడంతో పాటు, ప్రభుత్వ వెబ్సైట్లను పోలిన నకిలీ పోర్టల్స్ రూపొందించి బాధితులను నమ్మించారు. ఉద్యోగాల కోసం దరఖాస్తు చేసుకున్న నలుగురు బాధితుల నుంచి వివిధ దశల్లో మొత్తం రూ.50.87 లక్షలు వసూలు చేసినట్లు పోలీసులు గుర్తించారు. ఉద్యోగ నియామక ప్రక్రియ పూర్తయిందని, త్వరలోనే నియామక ఉత్తర్వులు వస్తాయని చెబుతూ బాధితులను నమ్మించినట్లు తెలుస్తోంది. డబ్బులు తీసుకున్న తర్వాత నిందితులు స్పందించకపోవడంతో బాధితులు అనుమానం వ్యక్తం చేసి మంత్రి కార్యాలయానికి వెళ్లి ఫిర్యాదు చేశారు.
ఈ వ్యవహారంపై ఐటీ మంత్రి కార్యాలయానికి ఫిర్యాదులు అందడంతో అధికారులు అప్రమత్తమయ్యారు. నకిలీ ఓఎస్డీ పేరుతో జరుగుతున్న మోసంపై పరిశ్రమల శాఖ ప్రిన్సిపల్ సెక్రటరీ పోలీసులకు ఫిర్యాదు చేశారు. నకిలీ ఐడీ కార్డులు, నియామక పత్రాలు, వెబ్సైట్లు, బ్యాంకు లావాదేవీలపై సమగ్ర దర్యాప్తు చేపట్టాలని కోరారు. ప్రభుత్వ అధికారుల పేర్లు, హోదాలను దుర్వినియోగం చేస్తూ నిరుద్యోగులను మోసం చేస్తున్న వారిపై కఠిన చర్యలు తీసుకోవాలని సూచించారు.
పోలీసులు, టాస్క్ఫోర్స్ అధికారులు దర్యాప్తులో భాగంగా ఇదే తరహాలో మరో ఎనిమిది మందిని కూడా ప్రభుత్వ ఉద్యోగాల పేరుతో మోసం చేసినట్లు గుర్తించారు. నిందితుల నుంచి నకిలీ ఐడీ కార్డులు, తెలంగాణ ప్రభుత్వ పేరుతో ఉన్న కారు, పలు కీలక పత్రాలు, రూ.2.5 లక్షల నగదును స్వాధీనం చేసుకున్నారు. ప్రధాన నిందితుడు కొలుగూరి రవికిరణ్పై వివిధ సెక్షన్ల కింద కేసు నమోదు చేసి విచారణ కొనసాగిస్తున్నారు. ఈ మోసంలో ఇంకా ఎవరెవరి ప్రమేయం ఉంది? నకిలీ నియామక పత్రాలు ఎక్కడ తయారు చేశారు? వసూలు చేసిన డబ్బును ఎక్కడికి తరలించారు? అనే కోణాల్లో పోలీసులు దర్యాప్తు చేస్తున్నారు.
ప్రభుత్వ ఉద్యోగాల కోసం ప్రయత్నిస్తున్న నిరుద్యోగులు ఇలాంటి మోసగాళ్ల పట్ల అప్రమత్తంగా ఉండాలని అధికారులు సూచిస్తున్నారు. ప్రభుత్వ ఉద్యోగ నియామకాలు అధికారిక వెబ్సైట్లు, నోటిఫికేషన్లు, పారదర్శకమైన ఎంపిక ప్రక్రియ ద్వారా మాత్రమే జరుగుతాయని, ఉద్యోగాలు ఇప్పిస్తామని చెప్పి డబ్బులు అడిగే వ్యక్తులను నమ్మవద్దని హెచ్చరిస్తున్నారు. మంత్రి కార్యాలయాలు, ప్రభుత్వ అధికారుల పేర్లతో వచ్చే నకిలీ ఫోన్ కాల్స్, ఐడీ కార్డులు, నియామక ఉత్తర్వులను పూర్తిగా పరిశీలించిన తర్వాతే స్పందించాలని సూచిస్తున్నారు.



























