ప్రతిపక్షం, నవంబర్ 17: టీమిండియా మాజీ కెప్టెన్, చెన్నై సూపర్ కింగ్స్ దిగ్గజ ఆటగాడు మహేంద్ర సింగ్ ధోనీ ఐపీఎల్కు రిటైర్మెంట్ ప్రకటించినట్లు సమాచారం. ఈ విషయాన్ని చెన్నై సూపర్ కింగ్స్ యాజమాన్యం అధికారికంగా వెల్లడించింది. ఇకపై ధోనీ ఆటగాడిగా కాకుండా జట్టుకు మెంటార్గా వ్యవహరించనున్నట్లు ప్రకటించింది. దాదాపు రెండు దశాబ్దాలుగా చెన్నై జట్టుతో విడదీయలేని అనుబంధాన్ని కొనసాగించిన ధోనీ, తన ఆటతీరుతో పాటు నాయకత్వ లక్షణాలతో సీఎస్కేకు ప్రత్యేక గుర్తింపు తీసుకొచ్చారు. ఆయన సారథ్యంలో చెన్నై సూపర్ కింగ్స్ ఎన్నో విజయాలను అందుకుంది. జట్టుకు ఎన్నో చిరస్మరణీయ విజయాలు అందించిన ధోనీ సేవలు అభిమానుల మనసుల్లో ప్రత్యేక స్థానం సంపాదించుకున్నాయి.
ధోనీ రిటైర్మెంట్ నిర్ణయంపై సీఎస్కే యజమాని శ్రీనివాసన్ భావోద్వేగానికి గురయ్యారు. ధోనీ లేకుండా చెన్నై సూపర్ కింగ్స్ను ఊహించుకోవడం కష్టమని వ్యాఖ్యానించారు. గత రెండు దశాబ్దాలుగా ధోనీ తమతో కలిసి ప్రయాణించారని, జట్టుతో ఆయనకు ఉన్న అనుబంధం ఎంతో ప్రత్యేకమైనదని పేర్కొన్నారు. సీఎస్కే ఎప్పటికీ ధోనీ ఇల్లేనని, ఆయనకు చెన్నై జట్టుతో ఉన్న బంధం ఆటగాడిగా కొనసాగిన కాలానికి మాత్రమే పరిమితం కాదని భావోద్వేగంగా స్పందించారు. ఆటగాడిగా మైదానంలో ఎన్నో విజయాలు అందించిన ధోనీ, ఇప్పుడు మెంటార్గా కొత్త బాధ్యతలు చేపట్టనున్నారనే ప్రకటన అభిమానుల్లో ఆసక్తిని పెంచింది.




























