*ఆధ్యాత్మిక శోభను సంతరించుకున్న సిద్ధన్నపేట, తిమ్మాయిపల్లి
ప్రతిపక్షం, నంగునూరు, అక్టోబరు 16: అమ్మవారి నామస్మరణ.. మహిళల కుంకుమ అర్చనలు. వెయ్యి దీపాల వెలుగులు.. భక్తుల సందడితో గ్రామాల్లో శరన్నవ రాత్రి ఉత్సవాలు వైభవంగా కొనసాగుతున్నాయి. నంగునూరు మండలం సిద్ధన్నపేటలో యువసేన ఆధ్వర్యంలో దుర్గమ్మ తల్లి సన్నిధిలో కుంకుమార్చన కార్యక్రమం నిర్వహించారు. తిమ్మాయిపల్లిలో రాక్ స్టార్ యూత్, రెడ్డి సంఘం ఆధ్వర్యంలో వెయ్యి దీపాల అలంకరణ చేపట్టారు. ఈ కార్యక్రమాలతో గ్రామాల్లో ఆధ్యాత్మిక వాతావరణం నెలకొంది.
సిద్ధన్నపేటలో కుంకుమార్చనలు
సిద్ధన్నపేటలో యువసేన ఆధ్వర్యంలో శుక్రవారం దుర్గమ్మ తల్లి సన్నిధిలో కుంకుమార్చన కార్యక్రమాన్ని భక్తి శ్రద్ధలతో నిర్వహించారు. గ్రామానికి చెందిన మహిళలు పెద్ద సంఖ్యలో పాల్గొన్నారు. అమ్మవారికి ప్రత్యేక పూజలు చేశారు. కుంకుమార్చనలు నిర్వహిస్తూ భక్తి పారవశ్యంలో మునిగి పోయారు. గ్రామ ప్రజలు సుఖసంతోషాలతో ఉండాలని ప్రార్థించారు. ప్రతి కుటుంబానికి ఆయురారోగ్యాలు, అష్టైశ్వర్యాలు కలగాలని అమ్మవారిని వేడుకున్నారు. మహిళల పూజలతో దుర్గామాత మండపం పరిసరాల్లో భక్తిభావం వెల్లివిరిసింది.
వెయ్యి దీపాల వెలుగుల్లో తిమ్మాయిపల్లి
నంగునూరు మండలం తిమ్మాయిపల్లిలో రాక్ స్టార్ యూత్, రెడ్డి సంఘం ఆధ్వర్యంలో శరన్నవరాత్రి ఉత్సవాలు ఘనంగా కొనసాగుతున్నాయి. ఉత్సవాల్లో భాగంగా గురువారం రాత్రి అమ్మవారి మండపం సమీపంలో వెయ్యి దీపాలను వెలిగించారు. మహిళలు భక్తితో దీపాలు వెలిగించారు. దీపాల కాంతులతో ఆలయ పరిసరాలు దేదీప్యమానంగా మారాయి. గ్రామంలోని మార్గాలు వెలుగులతో నిండిపోయాయి. ఈ దృశ్యం భక్తులను విశేషంగా ఆకట్టుకుంది.భక్తులు అమ్మవారిని దర్శించుకుని ప్రత్యేక పూజలు చేశారు. దీపాల వెలుగులు, అమ్మవారి నామస్మరణతో గ్రామంలో పండుగ వాతావరణం నెలకొంది. సంప్రదాయాలకు ప్రతీకగా నిలిచే ఈ కార్యక్రమాలు భక్తిభావాన్ని చాటిచెప్పాయి. శరన్నవరాత్రి వేడుకలు గ్రామాల్లో భక్తులను ఒక్కచోట చేర్చి ఆధ్యాత్మిక సందడిని నింపాయి.
