రూ.50 లక్షల జీతాన్ని వదిలి జైన సన్యాసినిగా మారిన టెకీ అక్షిత!

ప్రతిపక్షం, నవంబర్ 18: లక్షల రూపాయల వార్షిక వేతనం, ప్రముఖ అంతర్జాతీయ సంస్థల్లో ఉద్యోగం, విలాసవంతమైన జీవితం.. ఇవన్నీ ఉన్నప్పటికీ గురుగ్రామ్‌కు చెందిన 37 ఏళ్ల అక్షిత మాత్రం భిన్నమైన మార్గాన్ని ఎంచుకున్నారు. ఏడాదికి రూ.50 లక్షల జీతం అందుకుంటున్న ఉద్యోగాన్ని వదులుకుని జైన సన్యాసినిగా మారాలని నిర్ణయించుకున్నారు. ప్రస్తుతం వోక్స్‌వ్యాగన్ సంస్థలో ఇంజినీర్‌గా పనిచేస్తున్న ఆమె, గతంలో ఫియట్, మెర్సిడెస్ బెంజ్ వంటి ప్రముఖ ఆటోమొబైల్ సంస్థల్లోనూ విధులు నిర్వహించారు. మంచి విద్యార్హతలు, ఉన్నత స్థాయి ఉద్యోగం, ఆకర్షణీయమైన వేతనం ఉన్నప్పటికీ వాటన్నింటినీ వదిలి ఆధ్యాత్మిక జీవితం వైపు అడుగులు వేయడం ఇప్పుడు ఆసక్తికరంగా మారింది.

అక్షిత ఈ నిర్ణయం తీసుకోవడానికి పర్యావరణంపై కలిగిన ఆందోళనే ప్రధాన కారణమని తెలుస్తోంది. ముఖ్యంగా డేటా సెంటర్ల నిర్వహణ, వాటి ద్వారా పర్యావరణంపై పడుతున్న ప్రభావం ఆమెను కలచివేసిందట. ఆధునిక సాంకేతిక వ్యవస్థల వినియోగం పెరుగుతున్న కొద్దీ పర్యావరణానికి ఎదురవుతున్న సమస్యలపై ఆమె ఆలోచించడం ప్రారంభించారు. భూమిలో నివసించే సూక్ష్మజీవులకు కూడా మానవ కార్యకలాపాల వల్ల హాని కలుగుతోందన్న ఆందోళన ఆమెను మరింత ప్రభావితం చేసిందని సమాచారం. జీవుల పట్ల కరుణ, అహింస, ప్రకృతిని కాపాడాలనే ఆలోచనలతో ప్రాపంచిక జీవితానికి దూరమై జైన సన్యాస మార్గాన్ని ఎంచుకున్నట్లు తెలుస్తోంది.

అక్షిత తీసుకున్న నిర్ణయంలో మరో విశేషం కూడా ఉంది. ఆమె తల్లి శిరోమణి (61) కూడా ఆధ్యాత్మిక మార్గాన్ని ఎంచుకుని సాధ్విగా మారారు. ఇండియన్ ఆయిల్ కార్పొరేషన్‌లో చీఫ్ మేనేజర్‌గా పనిచేసి పదవీ విరమణ చేసిన శిరోమణి కూడా ప్రాపంచిక జీవితాన్ని విడిచిపెట్టి సన్యాసం స్వీకరించడం విశేషం. తల్లీకూతుళ్లు ఇద్దరూ ఒకే మార్గాన్ని ఎంచుకోవడం పలువురిని ఆశ్చర్యానికి గురిచేస్తోంది.

సాధారణంగా ఉన్నత విద్యను అభ్యసించి, ప్రముఖ సంస్థల్లో ఉద్యోగాలు సంపాదించినవారు మరింత ఉన్నత స్థానాలకు చేరుకోవాలని ఆశిస్తుంటారు. అందుకు భిన్నంగా అక్షిత రూ.50 లక్షల వార్షిక వేతనాన్ని, కార్పొరేట్ ఉద్యోగ జీవితాన్ని వదులుకోవడం చర్చనీయాంశంగా మారింది. డబ్బు, హోదా, ఉద్యోగ భద్రత కంటే జీవుల పట్ల కరుణ, అహింస, ఆధ్యాత్మిక ప్రశాంతతకు ప్రాధాన్యం ఇస్తూ ఆమె తీసుకున్న ఈ నిర్ణయం పలువురి దృష్టిని ఆకర్షిస్తోంది.

Related News

Latest News