విలేకరుల అవమానంపై ఆవేదన.. సీనియర్లకు సముచిత గౌరవం ఏదీ?
పార్టీ బలోపేతానికి ఐక్యతే మార్గమంటున్న స్థానిక నాయకత్వం
కూకట్‌పల్లి, ప్రతిపక్షం,నవంబర్ 10 : కూకట్‌పల్లి నియోజకవర్గ కాంగ్రెస్‌లో అంతర్గత విభేదాలు మరోసారి తెరపైకి వచ్చాయి. పార్టీ బలోపేతం, నాయకుల మధ్య సమన్వయం, సీనియర్ నాయకులకు ప్రాధాన్యం వంటి అంశాలపై రాజకీయ చర్చ మొదలైంది. అధికారం ఉందని అహంకార ధోరణితో వ్యవహరించడం సరికాదని, పార్టీ కోసం ఏళ్ల తరబడి కష్టపడిన నాయకులు, కార్యకర్తలను విస్మరించడం తగదని స్థానిక కాంగ్రెస్ నాయకత్వం అభిప్రాయపడుతోంది.
విలేకరులకు అవమానం జరిగిందా?
కూకట్‌పల్లిలో కాంగ్రెస్ నాయకుడిగా చెప్పుకుంటున్న బండి రమేష్ నిర్వహించిన ప్రెస్‌మీట్‌పై పత్రికల్లో వచ్చిన కథనాలు చర్చనీయాంశంగా మారాయి. పండుగ రోజున విలేకరులను సమావేశానికి ఆహ్వానించి దాదాపు రెండు గంటలపాటు వేచి ఉండేలా చేశారని, ప్రశ్నలు అడిగేందుకు అవకాశం కల్పించలేదనే ఆరోపణలు వ్యక్తమయ్యాయి. మీడియా ప్రతినిధులను పిలిచి వారి ప్రశ్నలకు సమాధానాలు ఇవ్వకపోవడం ఎంతవరకు సమంజసమనే ప్రశ్నలు ఉత్పన్నమవుతున్నాయి. ఈ వ్యవహారంపై పత్రికా సోదరులకు కలిగిన అసౌకర్యానికి విచారం వ్యక్తం చేస్తూ, క్షమాపణలు కోరుతున్నట్లు స్థానిక నాయకత్వం పేర్కొంది.
సీనియర్లను విస్మరిస్తే పార్టీ ఎలా బలోపేతం?
కాంగ్రెస్ పార్టీ అభివృద్ధికి ఎన్నో ఏళ్లుగా కృషి చేసిన సీనియర్ నాయకులు, కార్యకర్తలను కలుపుకొని ముందుకు సాగాల్సిన అవసరం ఉందని నాయకులు సూచిస్తున్నారు. అన్ని సామాజిక వర్గాలకు సముచిత ప్రాధాన్యం కల్పించాల్సి ఉండగా, ఒకే సామాజిక వర్గానికి ప్రాధాన్యం ఇస్తున్నారనే విమర్శలు రావడం పార్టీకి మంచిది కాదని పేర్కొంటున్నారు. కాంగ్రెస్ అంటే అందరి పార్టీ అని, వ్యక్తిగత ఆధిపత్యానికి తావులేదని స్పష్టం చేస్తున్నారు.
ప్రజల్లోకి వెళ్లి గెలుపు కోసం కృషి చేయాలి
ఎన్నికల్లో ఓటమి ఎదురైన నాయకులు తిరిగి ప్రజాభిమానాన్ని పొందాలంటే ప్రజల్లోకి వెళ్లాలని, వారి సమస్యల పరిష్కారానికి కృషి చేయాలని సూచిస్తున్నారు. కార్యకర్తలకు అందుబాటులో ఉంటూ స్థానిక నాయకత్వాన్ని కలుపుకొని కార్యక్రమాలు నిర్వహించాల్సిన అవసరం ఉందంటున్నారు. కేవలం ప్రచారానికి పరిమితం కాకుండా ప్రజాసేవకు ప్రాధాన్యమివ్వాలని హితవు పలుకుతున్నారు.
ఐక్యతతోనే పార్టీకి భవిష్యత్తు
కూకట్‌పల్లి కాంగ్రెస్‌లో వ్యక్తిగత ప్రయోజనాల కంటే పార్టీ ప్రయోజనాలకే పెద్దపీట వేయాలని నాయకులు కోరుతున్నారు. సీనియర్లకు గౌరవం, యువతకు ప్రోత్సాహం, మహిళలకు అవకాశాలు కల్పిస్తూ అన్ని వర్గాలను కలుపుకొని ముందుకు సాగాలని సూచిస్తున్నారు.
కాంగ్రెస్ పార్టీ ఎవరి వ్యక్తిగత ఆస్తి కాదని, కార్యకర్తల త్యాగాలు, ప్రజల ఆదరణతో నిర్మితమైన ప్రజా ఉద్యమమని పేర్కొంటున్నారు. కూకట్‌పల్లి కాంగ్రెస్ నిన్న, నేడు, రేపు కూడా బలంగా ఉంటుందని, ఐక్యతను కాపాడుకుంటూ పార్టీని మరింత శక్తివంతం చేయాల్సిన బాధ్యత ప్రతి ఒక్కరిపై ఉందని స్పష్టం చేస్తున్నారు.
