ప్రతిపక్షం, నవంబర్ 09: తెలంగాణలో భూముల రికార్డుల నిర్వహణ కోసం ప్రవేశపెట్టిన ధరణి పోర్టల్‌లో చోటుచేసుకున్నట్లు ఆరోపణలు ఎదుర్కొంటున్న అక్రమాల వెనుక పెద్ద నెట్‌వర్క్‌ ఉన్నట్లు సీఐడీ ప్రత్యేక దర్యాప్తు బృందం (సిట్‌) విచారణలో కీలక విషయాలు వెలుగులోకి వస్తున్నాయి. మండల కేంద్రాల్లోని ఎంపిక చేసిన మీ సేవ కేంద్రాల నుంచి హైదరాబాద్‌లోని చార్మినార్‌ సమీపంలోని ఓ ప్రైవేట్‌ కార్యాలయం వరకు ఈ వ్యవహారం విస్తరించినట్లు దర్యాప్తు అధికారులు అనుమానిస్తున్నారు. భూముల యజమానుల వివరాలు మార్చడం, వివాదాల్లో ఉన్న భూములను రికార్డుల్లో నమోదు చేయడం, అధికారుల ప్రమేయం లేకుండానే భూ వినియోగ మార్పిడులు చేపట్టడం వంటి ఆరోపణలపై సిట్‌ లోతుగా విచారణ జరుపుతోంది.
ధరణి, భూ భారతి భూ రికార్డుల అక్రమాలకు సంబంధించి సీఐడీ ఇప్పటివరకు తొమ్మిది మందిని అధికారికంగా అరెస్టు చేసినట్లు సమాచారం. సంగారెడ్డిలోని ఆర్‌సీ పురం పోలీస్‌స్టేషన్‌లో నమోదైన కేసులో తొలుత నలుగురిని అరెస్టు చేయగా, అనంతరం రాష్ట్రవ్యాప్తంగా పలు ప్రాంతాల్లో నిర్వహించిన సోదాల తర్వాత మరో ఐదుగురిని అదుపులోకి తీసుకున్నారు. దీంతో ఈ కేసులో మొత్తం అరెస్టుల సంఖ్య తొమ్మిదికి చేరింది. ఈ నెట్‌వర్క్‌లో ఇంకా ఎవరెవరి ప్రమేయం ఉంది? భూ రికార్డుల మార్పులకు సహకరించిన వ్యక్తులు ఎవరు? అనే అంశాలపై అధికారులు ఆధారాలు సేకరిస్తున్నారు.
దర్యాప్తులో భాగంగా కొన్ని మీ సేవ కేంద్రాల నిర్వాహకులు ప్రత్యేకంగా వాట్సాప్‌ గ్రూపులు ఏర్పాటు చేసుకున్నట్లు గుర్తించినట్లు తెలుస్తోంది. ధరణి పోర్టల్‌లో మార్పులు చేయించుకోవాలనుకునే వారి దరఖాస్తులను ఈ గ్రూపుల ద్వారా సేకరించి, హైదరాబాద్‌లోని చార్మినార్‌ సమీపంలోని ప్రైవేట్‌ కార్యాలయానికి పంపినట్లు అధికారులు అనుమానిస్తున్నారు. అక్కడి నుంచి పోర్టల్‌లోని లాగిన్‌ సదుపాయాలను దుర్వినియోగం చేసి భూ రికార్డుల్లో మార్పులు చేసినట్లు ఆరోపణలు ఉన్నాయి. భూ యజమానుల పేర్లను మార్చడం, వివాదాల్లో ఉన్న భూములను నమోదు చేయడం, సంబంధిత తహసీల్దార్ల ప్రమేయం లేకుండానే భూ వినియోగ మార్పిడి ప్రక్రియలను చేపట్టడం వంటి అంశాలు సిట్‌ పరిశీలనలో ఉన్నట్లు సమాచారం.
డిజిటల్‌ ఫోరెన్సిక్‌ లాగ్‌లను పరిశీలించిన దర్యాప్తు బృందం భూముల రికార్డుల్లో కీలక మార్పులు సాయంత్రం 5.30 గంటల నుంచి రాత్రి 10 గంటల మధ్య జరిగినట్లు గుర్తించినట్లు తెలుస్తోంది. సాధారణ ప్రభుత్వ కార్యాలయాల పని వేళలు ముగిసిన తర్వాత ఈ మార్పులు చేపట్టడం వెనుక ఉద్దేశం ఏమిటన్న కోణంలో అధికారులు విచారణ చేస్తున్నారు. సాధారణ సమయాల్లో అధికారుల పర్యవేక్షణ ఎక్కువగా ఉండటంతో, సాయంత్రం తర్వాత రికార్డుల్లో మార్పులు చేయడం ద్వారా తనిఖీల నుంచి తప్పించుకోవచ్చని భావించారా? అనే అంశాన్ని కూడా పరిశీలిస్తున్నట్లు సమాచారం. ఈ కేసు దర్యాప్తును మరింత వేగవంతం చేసేందుకు సీఐడీ డీజీ చారు సిన్హా పర్యవేక్షణలో 15 ప్రత్యేక బృందాలను ఏర్పాటు చేసినట్లు కథనం పేర్కొంది.
ధరణి పోర్టల్‌ను అభివృద్ధి చేసిన ఐఎల్‌ అండ్‌ ఎఫ్‌ఎస్‌ టెర్రాసిస్‌ టెక్నాలజీస్‌ సంస్థ కార్యాలయంలోనూ సిట్‌ అధికారులు తనిఖీలు చేపట్టారు. హైదరాబాద్‌లోని మాదాపూర్‌ జయభేరి సిలికాన్‌ టవర్స్‌లో ఉన్న కార్యాలయాన్ని సందర్శించి పోర్టల్‌ సాఫ్ట్‌వేర్‌ నిర్మాణం, వివిధ మాడ్యూళ్ల అభివృద్ధి, వినియోగదారుల లాగ్‌లు, డేటాబేస్‌ పర్యవేక్షణకు సంబంధించిన అనుమతులపై వివరాలు సేకరించినట్లు సమాచారం. భూముల రికార్డుల్లో మార్పులు చేయగలిగే అడ్మినిస్ట్రేటర్‌, మాస్టర్‌ లాగిన్లను ఎవరు నియంత్రించేవారు? వాటికి సంబంధించిన అనుమతులు ఎవరికి ఉండేవి? ప్రైవేట్‌ వ్యక్తులకు కీలక డేటాపై నియంత్రణ ఎలా లభించింది? అనే ప్రశ్నలకు సమాధానాలు రాబట్టేందుకు అధికారులు ప్రయత్నిస్తున్నారు. ఇందుకోసం ఐటీ నిపుణుల సహకారంతో లాగిన్‌ యాక్సెస్‌, అనుమతుల కేటాయింపు, ప్రైవేట్‌ వ్యక్తుల పాత్రను విశ్లేషిస్తున్నారు.
మరోవైపు ధరణి పోర్టల్‌ నిర్వహణకు సంబంధించి 2018లో తెలంగాణ టెక్నాలజీ సర్వీసెస్‌ (టీజీటీఎస్‌) నిర్వహించిన టెండర్‌ ప్రక్రియ వివరాలను కూడా సిట్‌ సేకరించినట్లు తెలుస్తోంది. పోర్టల్‌ నిర్వహణ బాధ్యతలు ఎలా అప్పగించారు? సాంకేతిక అనుమతులు, డేటా భద్రతకు సంబంధించిన నిబంధనలు ఏ విధంగా అమలయ్యాయి? అనే అంశాలపై కూడా దర్యాప్తు సాగుతోంది. అక్టోబర్‌ 2020 నుంచి డిసెంబర్ 2024 వరకు నమోదైన దాదాపు ఎనిమిది లక్షల లావాదేవీలను పరిశీలించిన ఫోరెన్సిక్‌ ఆడిట్‌లో సుమారు 22 వేల లావాదేవీలు అనుమానాస్పదంగా ఉన్నట్లు గుర్తించినట్లు సమాచారం. ఈ లావాదేవీల వెనుక ఉన్న వ్యక్తులు, వాటి ద్వారా లబ్ధి పొందినవారు, రికార్డుల మార్పులకు ఉపయోగించిన సాంకేతిక మార్గాలను గుర్తించడం ఇప్పుడు సిట్‌కు కీలకంగా మారింది. దర్యాప్తు పూర్తయిన తర్వాతే ఈ వ్యవహారంలో ఎవరెవరి పాత్ర ఎంతవరకు ఉందన్నది స్పష్టమయ్యే అవకాశం ఉంది.
