ప్రతిపక్షం, అక్టోబర్ 03: కేంద్ర హోంమంత్రి అమిత్‌ షా తెలంగాణ పర్యటనకు రానున్నారు. అక్టోబర్ 3న రాత్రి హైదరాబాద్‌కు చేరుకోనున్న ఆయన.. మరుసటి రోజు మెదక్‌, కరీంనగర్‌ జిల్లాల్లో పలు కార్యక్రమాల్లో పాల్గొననున్నారు. అక్టోబర్ 3న రాత్రి 9 గంటల సమయంలో బేగంపేట విమానాశ్రయానికి చేరుకుని హైదరాబాద్‌లో బస చేయనున్నట్లు తాజా షెడ్యూల్‌ వెల్లడిస్తోంది.
అమిత్‌ షా హైదరాబాద్‌లో ఉన్న సమయంలో బీజేపీ రాష్ట్ర ముఖ్య నేతలతో సమావేశం నిర్వహించే అవకాశం ఉంది. రాష్ట్రంలో పార్టీ సంస్థాగత వ్యవహారాలు, ఇటీవలి రాజకీయ పరిణామాలు, రానున్న ఎన్నికలకు సంబంధించిన అంశాలపై నేతలతో చర్చించే అవకాశం ఉన్నట్లు పార్టీ వర్గాల్లో చర్చ జరుగుతోంది. ముఖ్యంగా కొత్తగా నియమితులైన రాష్ట్ర పార్టీ ఇన్‌చార్జి, సహ ఇన్‌చార్జులతో ఆయన భేటీపై కూడా దృష్టి నెలకొంది.
అయితే అధికారికంగా ప్రకటించిన అక్టోబర్ 4వ తేదీ పర్యటనలో ప్రధానంగా అభివృద్ధి, విద్యా రంగాలకు సంబంధించిన కార్యక్రమాలే ఉన్నాయి. ఉదయం హైదరాబాద్‌ నుంచి హెలికాప్టర్‌లో మెదక్‌ జిల్లా తూప్రాన్‌కు అమిత్‌ షా వెళ్లనున్నారు. అక్కడ ఉర్జా పారిశ్రామిక పార్కులో సబర్‌ డెయిరీ ఉత్పత్తుల పాల ప్లాంట్‌ పనులకు శంకుస్థాపన కార్యక్రమంలో పాల్గొంటారు. ఈ ప్రాజెక్టును గుజరాత్‌ సహకార పాల మార్కెటింగ్‌ సమాఖ్యకు చెందిన సబర్‌ డెయిరీ చేపడుతోంది.
ఈ డెయిరీ ప్లాంట్‌ ద్వారా రోజుకు ఐదు లక్షల లీటర్ల పాలను ప్రాసెస్‌ చేసే సామర్థ్యం ఉండనున్నట్లు కేంద్ర మంత్రి కిషన్‌రెడ్డి వెల్లడించారు. పెరుగు, మజ్జిగ, లస్సీ, పనీర్‌, ఐస్‌క్రీమ్‌, తాజా స్వీట్లు, బేకరీ ఉత్పత్తులు, నెయ్యి తదితర ఉత్పత్తులను కూడా తయారు చేసే సామర్థ్యం ప్రాజెక్టుకు ఉండనుందని తెలిపారు. ఈ ప్రాజెక్టు ద్వారా తెలంగాణలో పాడి పరిశ్రమకు, పాడి రైతులకు మార్కెట్‌ అవకాశాలు విస్తరించే ఉద్దేశం ఉందని పేర్కొన్నారు.
తూప్రాన్‌ కార్యక్రమం అనంతరం అమిత్‌ షా కరీంనగర్‌కు వెళ్లనున్నారు. అక్కడ నాగునూరులోని ప్రతిమ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ 25 సంవత్సరాలు పూర్తి చేసుకున్న సందర్భంగా నిర్వహిస్తున్న రజతోత్సవ వేడుకల్లో పాల్గొంటారు. ఈ సందర్భంగా రజతోత్సవ స్మారక స్తంభాన్ని ఆవిష్కరించడంతో పాటు ప్రతిమ డీమ్డ్‌ యూనివర్సిటీ భవనానికి శంకుస్థాపన చేయనున్నారు. సంస్థ ప్రస్థానాన్ని వివరించే ఫొటో ప్రదర్శనను కూడా ఆయన సందర్శించి, విద్యార్థులతో కార్యక్రమంలో పాల్గొననున్నట్లు షెడ్యూల్‌లో పేర్కొన్నారు.
అమిత్‌ షా పర్యటన నేపథ్యంలో తూప్రాన్‌, కరీంనగర్‌లో భద్రతా ఏర్పాట్లు కొనసాగుతున్నాయి. కరీంనగర్‌లో ప్రతిమ వైద్య కళాశాల ప్రాంగణంలోని హెలిప్యాడ్‌, కార్యక్రమ వేదిక, స్మారక స్తంభం ఆవిష్కరణ ప్రాంతం, విశ్వవిద్యాలయ భవన శంకుస్థాపన స్థలం తదితర ప్రాంతాలను అధికారులు ఇప్పటికే పరిశీలించారు.
అమిత్‌ షా పర్యటనకు సంబంధించి ప్రస్తుతం వెల్లడైన అధికారిక కార్యక్రమాల్లో బహిరంగ రాజకీయ సభ ప్రస్తావన లేదు. అయితే హైదరాబాద్‌లో బీజేపీ నేతలతో భేటీ ఉంటుందనే సమాచారం నేపథ్యంలో రాష్ట్ర పార్టీ వర్గాల్లో ఈ పర్యటనపై ఆసక్తి నెలకొంది.
