ప్రతిపక్షం, నవంబర్ 14: తెలంగాణలోని ప్రముఖ పుణ్యక్షేత్రం కొండగట్టు ఆంజనేయస్వామి ఆలయంలో భక్తులకు అరుదైన ఆధ్యాత్మిక ఘట్టం కనువిందు చేయనుంది. స్వామివారి విగ్రహంపై గత 61 ఏళ్లుగా పేరుకుపోయిన చందనాన్ని తొలగించే ప్రక్రియ రేపటి నుంచి ప్రారంభం కానుంది. ఐదు రోజుల పాటు ప్రత్యేకంగా ఈ కార్యక్రమాన్ని నిర్వహించనున్నారు. చందనం తొలగింపు ప్రక్రియ పూర్తయిన అనంతరం స్వామివారి నిజరూప దర్శనానికి భక్తులకు అవకాశం కల్పించనున్నారు. ఈ అరుదైన దర్శనం కోసం ఇప్పటికే భక్తుల్లో ఆసక్తి నెలకొంది.
ఆలయ సంప్రదాయాల ప్రకారం ఆంజనేయస్వామి విగ్రహానికి చందనం పూస్తూ వస్తున్నారు. ఈ క్రమంలో దశాబ్దాలుగా పేరుకుపోయిన చందనాన్ని తొలగించి స్వామివారి అసలు రూపాన్ని దర్శించుకునే అవకాశం భక్తులకు కల్పించనున్నారు. ఈ నెల 21 నుంచి డిసెంబర్‌ 29 వరకు నిజరూప దర్శనాలు కొనసాగనున్నాయి. దాదాపు ఆరు దశాబ్దాల తర్వాత మరోసారి ఈ అవకాశం రావడంతో కొండగట్టుకు భక్తుల రాక పెరిగే అవకాశం ఉంది. రాష్ట్రంలోని వివిధ ప్రాంతాల నుంచి మాత్రమే కాకుండా ఇతర ప్రాంతాల నుంచి కూడా భక్తులు స్వామివారిని దర్శించుకునేందుకు ఆసక్తి చూపుతున్నారు.
సుమారు 61 ఏళ్ల క్రితం కూడా ఇదే విధంగా స్వామివారి విగ్రహంపై పేరుకుపోయిన చందనాన్ని తొలగించి నిజరూప దర్శనానికి అవకాశం కల్పించారు. అప్పట్లో నిర్వహించిన కార్యక్రమంలో భాగస్వాములైన అర్చకుల్లో ప్రస్తుతం ముగ్గురు మాత్రమే జీవించి ఉన్నట్లు సమాచారం. ఇన్ని సంవత్సరాల తర్వాత మళ్లీ అదే తరహాలో చందనం తొలగింపు కార్యక్రమం చేపట్టనుండటంతో ఆలయ చరిత్రలో ఇది ప్రత్యేక ఘట్టంగా నిలవనుంది. ఐదు రోజుల పాటు జరిగే ఈ ప్రక్రియ అనంతరం భక్తులు డిసెంబర్‌ 29 వరకు కొండగట్టు అంజన్న నిజరూపాన్ని దర్శించుకోవచ్చు. ఈ అరుదైన ఆధ్యాత్మిక అవకాశాన్ని వినియోగించుకోవాలని భక్తులు ఆసక్తిగా ఎదురుచూస్తున్నారు.
