ప్రతిపక్షం, నవంబర్ 09: వాహనదారులకు తెలంగాణ రవాణా శాఖ కీలక వెసులుబాటు కల్పిస్తోంది. వాహనాన్ని కొనుగోలు చేసినా, విక్రయించినా యాజమాన్య హక్కుల బదిలీ కోసం ఇకపై తప్పనిసరిగా ఆర్టీఏ కార్యాలయానికి వెళ్లాల్సిన అవసరం ఉండదు. ఇంటి నుంచే ఆన్‌లైన్‌లో ఓనర్‌షిప్‌ ట్రాన్స్‌ఫర్‌ ప్రక్రియను పూర్తి చేసుకునే అవకాశం అందుబాటులోకి వచ్చింది. వాహన్‌ సిటిజన్‌ సర్వీసెస్‌ పోర్టల్‌ ద్వారా ఈ సేవలను పొందవచ్చు. దీనివల్ల వాహనదారులకు సమయం ఆదా కావడంతో పాటు కార్యాలయాల చుట్టూ తిరిగే ఇబ్బందులు కూడా తగ్గనున్నాయి.
వాహనాన్ని విక్రయించే వ్యక్తి, కొనుగోలు చేసే వ్యక్తి ఇద్దరూ వాహన్‌ పోర్టల్‌లో అవసరమైన వివరాలతో దరఖాస్తు సమర్పించాల్సి ఉంటుంది. విక్రయదారుడు, కొనుగోలుదారు తమవైపు నుంచి దరఖాస్తు ప్రక్రియను పూర్తి చేసిన తర్వాత సంబంధిత పరిశీలన, నిబంధనల ప్రకారం కొత్త రిజిస్ట్రేషన్‌ సర్టిఫికెట్‌ (ఆర్‌సీ) జారీ అవుతుంది. దీంతో వాహనం యాజమాన్య హక్కుల బదిలీ ప్రక్రియను ఆన్‌లైన్‌లోనే పూర్తి చేసుకునేందుకు వీలుంటుంది. ముఖ్యంగా ఉద్యోగాలు, ఇతర పనుల కారణంగా ఆర్టీఏ కార్యాలయాలకు వెళ్లేందుకు సమయం కేటాయించలేని వారికి ఈ సదుపాయం ఉపయోగకరంగా మారనుంది.
ఇక ఇతర రాష్ట్రాలకు వాహనాలను తరలించే వారు అవసరమైన నో అబ్జెక్షన్‌ సర్టిఫికెట్‌ (ఎన్‌ఓసీ) కోసం కూడా ఇదే పోర్టల్‌ను ఉపయోగించుకోవచ్చు. అలాగే ఈ-కేవైసీ వివరాలను నవీకరించుకునే సదుపాయం కూడా అందుబాటులో ఉంది. రవాణా శాఖ అందిస్తున్న ఆన్‌లైన్‌ సేవల ద్వారా పలు పనులను ఇంటి నుంచే పూర్తి చేసుకునే అవకాశం లభిస్తోంది. అయితే ఆన్‌లైన్‌ సేవలను వినియోగించుకునే సమయంలో వాహనదారులు అప్రమత్తంగా ఉండాలని అధికారులు సూచిస్తున్నారు.
వాహన్‌ పోర్టల్‌ పేరుతో నకిలీ వెబ్‌సైట్లు, మోసపూరిత లింకులు వెలుగులోకి వచ్చే అవకాశం ఉన్నందున వాటి పట్ల జాగ్రత్తగా ఉండాలని హెచ్చరిస్తున్నారు. వ్యక్తిగత వివరాలు, వాహనానికి సంబంధించిన సమాచారం, చెల్లింపుల వివరాలను గుర్తుతెలియని వెబ్‌సైట్లలో నమోదు చేయవద్దని సూచిస్తున్నారు. అధికారిక వాహన్‌ సిటిజన్‌ సర్వీసెస్‌ పోర్టల్‌ ద్వారానే దరఖాస్తు చేసుకోవాలని, ఏదైనా అనుమానాస్పద లింక్‌ కనిపిస్తే దానిని తెరవకుండా ఉండాలని చెబుతున్నారు.
