సిద్ధిపేట మెడికల్ కళాశాలకు అనంతుల మదన్ మోహన్ పేరు

ముఖ్యమంత్రి చారిత్రాత్మక నిర్ణయం పట్ల హర్షం

తెలంగాణ తొలి దశ ఉద్యమ యోధుడికి సముచిత గౌరవం

*సంగు పురేందర్, తెలంగాణ మలిదశ ఉద్యమ రాజకీయ జేఏసీ ఛైర్మన్, సీనియర్ నాయకుడు

ప్రతిపక్షం, నంగునూరు, నవంబరు 21: తెలంగాణ ప్రత్యేక రాష్ట్ర సాధన కోసం జరిగిన తొలి దశ ఉద్యమంలో మాజీ మంత్రి, తెలంగాణ ప్రజా సమితి వ్యవస్థాపక అధ్యక్షుడు అనంతుల మదన్ మోహన్ కీలక పాత్ర పోషించారని తెలంగాణ మలిదశ ఉద్యమ రాజకీయ జేఏసీ నంగునూరు మండల ఛైర్మన్, సిద్ధన్నపేట సర్పంచి సంగు పురేందర్ పేర్కొన్నారు. ప్రత్యేక తెలంగాణ ఆకాంక్షను తెలంగాణ ప్రజా సమితి ద్వారా ప్రజల్లోకి బలంగా తీసుకెళ్లిన దివంగత సీనియర్ కాంగ్రెస్ నాయకుడు అనంతుల మదన్ మోహన్ పేరు తెలంగాణ చరిత్రలో మరువలేనిదని అన్నారు. శనివారం నంగునూరులో విలేకరులతో మాట్లాడుతూ ప్రత్యేక తెలంగాణ ఉద్యమ నినాదంతో 1970 సంవత్సరంలో సిద్ధిపేట ఎమ్మెల్యేగా గెలిచి ప్రజల్లోని ప్రత్యేక రాష్ట్ర ఆకాంక్షను బలంగా చాటారని చెప్పారు. సిద్ధిపేట అభివృద్ధిలో మదన్ మోహన్ చెరగని ముద్ర వేశారన్నారు. తెలంగాణ ఉద్యమానికి, రాష్ట్రానికి మదన్ మోహన్ చేసిన సేవలకు రాష్ట్ర ప్రభుత్వం సముచిత గుర్తింపు ఇవ్వడం హర్షణీయమన్నారు. సిద్ధిపేట ప్రభుత్వ మెడికల్ కళాశాలకు అనంతుల మదన్ మోహన్ పేరు పెట్టనున్నట్లు ముఖ్యమంత్రి రేవంత్‌రెడ్డి ప్రకటించడం తెలంగాణ ఉద్యమ చరిత్రకు, ఆ ఉద్యమంలో విశేష సేవలందించిన నాయకుడికి దక్కిన గౌరవమని ఆయన అభివర్ణించారు.

ఈ నెల 18వ తేదీన (గురువారం) సిద్ధిపేటలో నిర్వహించిన బహిరంగ సభలో ముఖ్యమంత్రి రేవంత్‌రెడ్డి చేసిన ప్రకటనపై సంగు పురేందర్ హర్షం వ్యక్తం చేశారు. ఈ సందర్భంగా ముఖ్యమంత్రి నిర్ణయాన్ని స్వాగతించారు. ముఖ్యమంత్రి ఎనుముల రేవంత్ రెడ్డికి ప్రత్యేక కృతజ్ఞతలు తెలిపారు. తెలంగాణ రాష్ట్ర సాధన కోసం దశాబ్దాల క్రితమే తన రాజకీయ ప్రస్థానాన్ని ఉద్యమ బాటలో సాగించిన మదన్ మోహన్ సేవలను నేటి తరానికి గుర్తు చేసేలా ప్రభుత్వం తీసుకున్న ఈ నిర్ణయం ఎంతో ప్రాధాన్యత కలిగిందని పేర్కొన్నారు. ప్రత్యేక తెలంగాణ రాష్ట్ర ఆకాంక్ష ప్రజల్లో బలంగా నాటుకోవడానికి తొలి దశ ఉద్యమ నాయకులు చేసిన కృషి మరువలేనిదని అన్నారు. అప్పటి రాజకీయ పరిస్థితుల్లో ప్రత్యేక తెలంగాణ వాదాన్ని ధైర్యంగా వినిపిస్తూ, ప్రజల్లో తెలంగాణ రాష్ట్ర సాధన పట్ల చైతన్యం కల్పించిన నాయకుల్లో అనంతుల మదన్ మోహన్ ఒకరని గుర్తుచేశారు. తెలంగాణ ప్రజల ఆకాంక్షలకు అనుగుణంగా సాగిన ఆయన పోరాటం, రాజకీయ సేవలు చిరస్మరణీయం అని కొనియాడారు. ఒక ప్రాంత అభివృద్ధికి, ప్రజల సంక్షేమానికి కృషి చేసిన నాయకుల సేవలను భవిష్యత్ తరాలకు పరిచయం చేయడంలో ఇలాంటి నిర్ణయాలు కీలక పాత్ర పోషిస్తాయని ఆయన అభిప్రాయపడ్డారు.

వైద్య విద్యను అభ్యసించే విద్యార్థులు, వైద్య కళాశాలకు వచ్చే ప్రజలు అనంతుల మదన్ మోహన్ పేరును నిరంతరం గుర్తుంచుకునే అవకాశం ఈ నిర్ణయం ద్వారా కలుగుతుందని పేర్కొన్నారు. విద్యాసంస్థలకు ఉద్యమ నాయకుల పేర్లు పెట్టడం అనేది కేవలం పేరుమార్పు మాత్రమే కాదని, వారి త్యాగాలు, పోరాటాలు, ప్రజాసేవను భావితరాలకు అందించే గౌరవప్రదమైన చర్య అని వివరించారు.సిద్ధిపేట ప్రభుత్వ మెడికల్ కళాశాలకు అనంతుల మదన్ మోహన్ పేరు పెట్టాలనే నిర్ణయం ఆయనకు లభించిన సముచిత గుర్తింపుతో పాటు తెలంగాణ తొలి దశ ఉద్యమ చరిత్రకు దక్కిన గౌరవమని సంగు పురేందర్ పేర్కొన్నారు. తెలంగాణ కోసం నిస్వార్థంగా పనిచేసిన నాయకుల సేవలను గుర్తించి గౌరవిస్తున్న ముఖ్యమంత్రి రేవంత్‌రెడ్డికి మరోసారి ప్రత్యేక ధన్యవాదాలు తెలిపారు. ప్రభుత్వం తీసుకున్న ఈ నిర్ణయం పట్ల తెలంగాణ ఉద్యమ అభిమానులు, మదన్ మోహన్ అనుచరులు హర్షం వ్యక్తం చేస్తున్నారని అన్నారు.

Related News

Latest News