ప్రతిపక్షం, ఆగస్టు 27: తమిళనాడులో నటుడు విజయ్ రాజకీయాల్లో సాధిస్తున్న విజయంపై లోక్సత్తా వ్యవస్థాపకుడు జయప్రకాశ్ నారాయణ ఆసక్తికర వ్యాఖ్యలు చేశారు. తమిళనాట విజయ్ సాధిస్తున్న ప్రజాదరణ, రాజకీయ విజయాన్ని తాను అనూహ్యంగా భావిస్తున్నట్లు తెలిపారు. టాలీవుడ్లో ఎంతో మంది ప్రముఖ హీరోలు ఉన్నప్పటికీ.. విజయ్ తరహాలో రాజకీయంగా అలాంటి విజయాన్ని సాధించడం అంత సులభం కాదని అభిప్రాయపడ్డారు.
అవినీతి అంతం కావాలని ప్రజలు కోరుకుంటున్నప్పటికీ, దాని కోసం ఉద్యమించేందుకు ముందుకు రావడం లేదని జయప్రకాశ్ నారాయణ అన్నారు. కేవలం ప్రభుత్వాలను మార్చడం వల్ల పాలనలో పూర్తిస్థాయి మార్పు రాదని, ప్రజల్లో మార్పు వచ్చినప్పుడే వ్యవస్థలో కూడా మార్పు సాధ్యమవుతుందని పేర్కొన్నారు.
తెలంగాణలో ప్రస్తుతం ప్రజల్లో అలాంటి మార్పు కనిపించడం లేదని ఆయన వ్యాఖ్యానించారు. సమాజంలో రాజకీయ, పాలనా మార్పులు రావాలంటే ప్రజలు కూడా తమ బాధ్యతను గుర్తించి చైతన్యవంతం కావాల్సిన అవసరం ఉందన్నారు. ప్రజల భాగస్వామ్యం లేకుండా అవినీతిని నిర్మూలించడం, పాలనా వ్యవస్థలో మార్పులు తీసుకురావడం కష్టమని వివరించారు.
ఇటీవల దేశవ్యాప్తంగా యువతలో కనిపిస్తున్న జనరేషన్ జెడ్ ఉద్యమాల ప్రభావం గురించి కూడా జయప్రకాశ్ నారాయణ ప్రస్తావించారు. యువత చేపడుతున్న ఉద్యమాల ఫలితాలు వెంటనే కనిపించకపోవచ్చని, వాటి ప్రభావం 10 నుంచి 15 ఏళ్ల తర్వాత స్పష్టంగా కనిపించే అవకాశం ఉందని అన్నారు.
లోక్సత్తా కార్యక్రమంలో మాట్లాడిన జయప్రకాశ్ నారాయణ.. ప్రజల్లో రాజకీయ చైతన్యం, సామాజిక బాధ్యత పెరగాల్సిన అవసరాన్ని నొక్కిచెప్పారు. ప్రజలు తమ సమస్యలపై ప్రశ్నించడం, వ్యవస్థలో మార్పు కోసం భాగస్వాములు కావడం ద్వారానే దీర్ఘకాలిక మార్పు సాధ్యమవుతుందని పేర్కొన్నారు.
