ప్రతిపక్షం, సెప్టెంబర్ 19: మాజీ ముఖ్యమంత్రి కేసీఆర్ కుటుంబ సభ్యుల భూముల వ్యవహారంపై విచారణ కొనసాగుతుందని టీపీసీసీ అధ్యక్షుడు మహేశ్ కుమార్ గౌడ్ తెలిపారు. ఈ అంశంపై తమ ప్రభుత్వం వెనక్కి తగ్గే ప్రసక్తే లేదని స్పష్టం చేశారు. ఢిల్లీలో శనివారం మీడియాతో మాట్లాడిన ఆయన.. కేసీఆర్ కుటుంబానికి వందల ఎకరాల భూములు ఎలా వచ్చాయో ప్రజలకు వివరించాలని డిమాండ్ చేశారు. ఆ భూములు చట్టబద్ధంగా తమవేనని చెబితే అందుకు సంబంధించిన పత్రాలను చూపించాలని సవాల్ చేశారు.
ఇందిరమ్మ రాజ్యంలో పేదలు, దళితులకు సొంతింటి కలను నెరవేర్చడమే కాంగ్రెస్ ప్రభుత్వ లక్ష్యమని మహేశ్ గౌడ్ పేర్కొన్నారు. భూముల వ్యవహారంలో అధికారులు విచారణ కొనసాగిస్తున్నారని తెలిపారు. భూములపై వస్తున్న ఆరోపణలకు సంబంధించి వాస్తవాలు వెలుగులోకి రావాల్సిన అవసరం ఉందన్నారు.
భూములపై ఉన్న 22ఏ నిబంధన అంశాన్ని కూడా ఆయన ప్రస్తావించారు. 22ఏ సమస్యకు కాంగ్రెస్ ప్రభుత్వమే కారణమంటూ ప్రతిపక్షాలు చేస్తున్న ప్రచారంలో వాస్తవం లేదని అన్నారు. ఈ అంశంపై ప్రజల్లో తప్పుడు సమాచారాన్ని వ్యాప్తి చేస్తున్నారని ఆరోపించారు.
కాళేశ్వరం ప్రాజెక్టు అవకతవకలపై విచారణకు సంబంధించి కూడా మహేశ్ గౌడ్ స్పందించారు. సీబీఐ విచారణ కోరుతూ లేఖ రాశామని తెలిపారు. ఈ వ్యవహారంపై కేంద్ర ప్రభుత్వం ఎందుకు స్పందించడం లేదో కేంద్ర మంత్రులు కిషన్ రెడ్డి, బండి సంజయ్ సమాధానం చెప్పాలని ప్రశ్నించారు.
మహాగణపతికి ప్రత్యేక పూజలు
ఢిల్లీలోని తెలంగాణ భవన్లో నిర్వహించిన మహాగణపతి పూజ కార్యక్రమంలో మహేశ్ కుమార్ గౌడ్ పాల్గొన్నారు. భక్తిశ్రద్ధలతో వినాయకుడికి ప్రత్యేక పూజలు నిర్వహించారు. తెలంగాణ రాష్ట్రం అన్ని రంగాల్లో అగ్రగామిగా నిలవాలని, రైతులు పాడిపంటలతో సుభిక్షంగా ఉండాలని ప్రార్థించినట్లు తెలిపారు. ముఖ్యమంత్రి రేవంత్ రెడ్డి నాయకత్వంలో రాష్ట్రం ప్రజాపాలన దిశగా ముందుకు సాగుతోందని పేర్కొన్నారు.
ఫిరాయింపులపై ప్రతిపక్షాలకు కౌంటర్
ఇటీవల హైకోర్టు ఇచ్చిన తీర్పును ప్రస్తావిస్తూ బీఆర్ఎస్పై మహేశ్ గౌడ్ విమర్శలు చేశారు. పార్టీ ఫిరాయింపుల అంశంలో బీఆర్ఎస్, బీజేపీలకు కాంగ్రెస్ను ప్రశ్నించే నైతిక హక్కు లేదని అన్నారు. గతంలో తలసాని శ్రీనివాస్ యాదవ్, సబితా ఇంద్రారెడ్డిని బీఆర్ఎస్లో చేర్చుకుని మంత్రి పదవులు ఇచ్చిన విషయాన్ని గుర్తు చేశారు.
వివిధ రాష్ట్రాల్లో ఇతర పార్టీల నేతలను బీజేపీ చేర్చుకున్న సందర్భాలు ఉన్నాయని, అలాంటి పార్టీ తమపై ఫిరాయింపుల విషయంలో విమర్శలు చేయడం సరికాదని అన్నారు. 2014లో జరిగిన పార్టీ ఫిరాయింపులకు, 2023 తర్వాత చోటుచేసుకున్న పరిణామాలకు తేడా ఉందని మహేశ్ గౌడ్ పేర్కొన్నారు. ఉపఎన్నికలు ఎప్పుడు వచ్చినా ఎదుర్కొనేందుకు కాంగ్రెస్ సిద్ధంగా ఉందన్నారు.
దానం నాగేందర్ అంశంపై అధిష్ఠానం నిర్ణయం తీసుకుంటుందని తెలిపారు. కడియం శ్రీహరిపై పార్టీ పరంగా ఎలాంటి నిర్ణయం తీసుకోలేదని స్పష్టం చేశారు. జన్వాడ ఫాంహౌస్ అంశాన్ని ప్రస్తావిస్తూ.. ఫాంహౌస్ సంస్కృతిపై బీఆర్ఎస్ నేతలు మాట్లాడటం విడ్డూరంగా ఉందని విమర్శించారు. ఎర్రవెల్లి ఫాంహౌస్ ఎంత విస్తీర్ణంలో ఉందో ప్రజలకు తెలియాలని అన్నారు. కేసీఆర్ ఫాంహౌస్ను స్వాధీనం చేసుకోవాలనే ఉద్దేశం తమ ప్రభుత్వానికి లేదని స్పష్టం చేశారు.
కాంగ్రెస్ ప్రజాప్రతినిధులు ఆస్తుల వివరాలు వెల్లడించాలి
కాంగ్రెస్ ప్రజాప్రతినిధులు తమ సొంత ఆస్తుల వివరాలను ప్రజలకు తెలియజేయాలని మహేశ్ కుమార్ గౌడ్ సూచించారు. తన ఆస్తుల వివరాలన్నీ బహిరంగంగానే ఉన్నాయని, తన ఆస్తులు పెరిగాయా లేదా అనే విషయాన్ని కూడా పరిశీలించవచ్చని అన్నారు.
రాబోయే ఎన్నికల్లో కాంగ్రెస్ విజయం సాధిస్తుందని ఆయన ధీమా వ్యక్తం చేశారు. ఖైరతాబాద్ ఉపఎన్నిక వస్తే కాంగ్రెస్ అభ్యర్థి విజయం సాధిస్తారని పేర్కొన్నారు. అభ్యర్థి ఎంపికను అధిష్ఠానం నిర్ణయిస్తుందని తెలిపారు. ప్రజలు ప్రభుత్వం అమలు చేస్తున్న సంక్షేమ పథకాలను గమనిస్తున్నారని అన్నారు.
కొండా సురేఖ, చిన్నారెడ్డితో తాను మాట్లాడానని, వారు కాంగ్రెస్లోనే కొనసాగుతారని మహేశ్ గౌడ్ తెలిపారు. పట్టభద్రుల నియోజకవర్గ ఎన్నికలకు సంబంధించి అభ్యర్థుల ఎంపికపై నివేదిక వచ్చిన తర్వాత నిర్ణయం తీసుకుంటామని చెప్పారు.
తెలంగాణలో అధికారంలోకి వస్తామని బీజేపీ నేతలు చెబుతున్నారని, అయితే వారి మాటలకు, చేతలకు పొంతన లేదని మహేశ్ గౌడ్ విమర్శించారు. రాష్ట్రంలో బీఆర్ఎస్ ప్రభావం తగ్గిపోయిందని, బీజేపీ కూడా రాష్ట్రంలో బలపడే పరిస్థితి లేదని ఆయన వ్యాఖ్యానించారు.
