న్యూఢిల్లీ, ప్రతిపక్షం ప్రతినిధి: తెలంగాణ సీఎం రేవంత్ రెడ్డి దిల్లీలో మంగళవారం బిజీ.. బిజీగా గడిపారు. ఈ క్రమంలోనే రోడ్లు, రవాణా శాఖ మంత్రి నితిన్ గడ్కరీతో భేటీ అయ్యారు. ఈ సందర్భంగా రాష్ట్రాభివృద్ధికి సంబంధించి జాతీయ రహదారుల నిర్మాణం, ఫ్లై ఓవర్ల అంశాలపై కేంద్రమంత్రితో సుమారు గంటపాటు చర్చించారు. ఈ చర్చల్లో డిప్యూటీ సీఎం భట్టి విక్రమార్క సహా మంత్రి కోమటిరెడ్డి పాల్గొన్నారు. ముఖ్యంగా రాష్ట్రాభివృద్ధికి తోడ్పడే ప్రధాన రహదారులు, రీజనల్ రింగ్ రోడ్డు సహా పలు అంశాలపై సుమారు గంటపాటు చర్చలు జరిపారు. ఈ సమావేశంలో సీఎం వెంట ఉపముఖ్యమంత్రి భట్టి విక్రమార్క, మంత్రి కోమటిరెడ్డి వెంకట్ రెడ్డి పాల్గొన్నారు.
ఈ భేటీలో తెలంగాణ ప్రభుత్వం చేపట్టిన రోడ్ల అభివృద్ధితో పాటు, అంతర్జాతీయ సంస్థల నుంచి రావాల్సిన నిధుల గురించి చర్చించినట్లు తెలుస్తోంది. వీటితో పాటు భువనగిరి రహదారి, సిర్పూర్‌ – కాగజ్‌నగర్‌ నేషనల్ హైవే, శ్రీశైలం ప్రాజెక్టు వద్ద కేంద్ర ప్రభుత్వం మంజూరు చేసిన తీగల వంతెనను మరో చోటికి మార్పు చేయాలని కేంద్ర మంత్రిని సీఎం రేవంత్ రెడ్డి కోరినట్లు సమాచారం. కేంద్రం నుంచి వీలైనన్ని ఎక్కువ నిధులు రాబట్టడంపై రేవంత్ ప్రభుత్వం ప్రధానంగా దృష్టిసారించింది. బకాయిలు సహా వివిధ రూపాల్లో వచ్చే గ్రాంట్లను పొందేలా కసరత్తు చేస్తోంది. ఈ మేరకు ముఖ్యమంత్రి రేవంత్ రెడ్డి దిల్లీ పర్యటనలో కేంద్ర మంత్రులను కలిసి ప్రత్యేక విజ్ఞాపన చేస్తున్నారు. తెలంగాణ రాష్ట్ర అవసరాలపై కేంద్రానికి విజ్ఞప్తి చేస్తున్నారు.
