ప్రతిపక్షం, జూలై 28: పార్లమెంట్ సమావేశాల ప్రారంభానికి ముందు జాతీయ ప్రజాస్వామ్య కూటమి (ఎన్డీఏ) ఢిల్లీలో కీలక పార్లమెంటరీ సమావేశాన్ని నిర్వహించింది. రాజధానిలోని బాలయోగి స్టేడియంలో ‘మంగళ్ మిలన్’ పేరుతో జరిగిన ఈ సమావేశానికి కూటమిలోని భాగస్వామ్య పార్టీల ఎంపీలు, ముఖ్య నాయకులు హాజరయ్యారు.
ఈ సమావేశంలో ఈసారి ప్రత్యేక ఆకర్షణగా నిలిచింది తృణమూల్ కాంగ్రెస్ నుంచి తిరుగుబాటు చేసి కొత్తగా ఏర్పడిన నేషనలిస్ట్ సిటిజన్స్ పార్టీ ఆఫ్ ఇండియా ప్రతినిధుల పాల్గొనడం. టీఎంసీకి దూరమైన ఈ నేతలు ఎన్డీఏ వేదికపై కనిపించడం దేశ రాజకీయాల్లో కొత్త చర్చకు దారితీసింది.
ఇటీవల ఢిల్లీలో జరిగిన నిరసనలు, పార్లమెంట్లో కేంద్ర ప్రభుత్వం ప్రవేశపెట్టనున్న యాంటీ పేపర్ లీక్ బిల్లు వంటి కీలక అంశాల నేపథ్యంలో ఈ సమావేశానికి మరింత ప్రాధాన్యం ఏర్పడింది. పార్లమెంట్లో ప్రభుత్వ వ్యూహం, బిల్లుల ఆమోదం, విపక్షాల విమర్శలకు సమాధానాలు వంటి అంశాలపై సమావేశంలో విస్తృతంగా చర్చించినట్లు సమాచారం.
రానున్న పార్లమెంట్ సమావేశాల్లో ప్రభుత్వ విధానాలను సమర్థంగా ప్రజల ముందుకు తీసుకెళ్లడం, చట్టసభల్లో సమన్వయంతో ముందుకు సాగడం, రాజకీయంగా బలమైన సందేశం ఇవ్వడం లక్ష్యంగా ఈ సమావేశాన్ని నిర్వహించినట్లు ఎన్డీఏ వర్గాలు పేర్కొన్నాయి.
టీఎంసీ రెబల్ నేతల హాజరు పశ్చిమ బెంగాల్ రాజకీయాల్లోనూ కొత్త సమీకరణాలకు సంకేతమా అనే చర్చ రాజకీయ వర్గాల్లో సాగుతోంది. పార్లమెంట్ సమావేశాల వేళ జరిగిన ఈ పరిణామం జాతీయ రాజకీయాల్లో ఆసక్తికర అంశంగా మారింది.
