ప్రతిపక్షం, హైదరాబాద్, జులై 30: ప్రధానమంత్రి నరేంద్ర మోదీ హయాంలో దేశ అప్పులు భారీగా పెరిగాయని తెలంగాణ ముఖ్యమంత్రి రేవంత్ రెడ్డి ఆరోపించారు. స్వాతంత్య్రం నుంచి 2014 వరకు దేశంపై ఉన్న మొత్తం అప్పు రూ.51 లక్షల కోట్లు కాగా, 2014 తర్వాత మోదీ ప్రభుత్వ హయాంలో అది రూ.151 లక్షల కోట్లకు చేరిందని పేర్కొన్నారు. ఈ అంశంపై మాట్లాడకుండా రాష్ట్ర ప్రభుత్వంపై విమర్శలు చేయడం సరికాదని బీజేపీ నేతలకు సూచించారు.
హైదరాబాద్లోని ఎంసీహెచ్ఆర్డీ (MCRHRD)లో గురువారం నిర్వహించిన కార్యక్రమం అనంతరం మీడియాతో మాట్లాడిన సీఎం రేవంత్ రెడ్డి, విమర్శలు చేస్తూ ముందుకు సాగడం కంటే ప్రజల అభివృద్ధి కోసం పనిచేయడమే తమ ప్రభుత్వ లక్ష్యమన్నారు. గత ప్రభుత్వాలపై విమర్శలకే పరిమితమైతే పాలన ముందుకు సాగదని వ్యాఖ్యానించారు.
రామచందర్ రావుకు సీఎం కౌంటర్
బీజేపీ తెలంగాణ అధ్యక్షుడు రామచందర్ రావు చేసిన వ్యాఖ్యలకు స్పందించిన సీఎం, రాష్ట్ర విద్యా వ్యవస్థ తమ ప్రభుత్వ హయాంలో మెరుగైన ఫలితాలు సాధిస్తోందన్నారు. ఒకప్పుడు జాతీయ స్థాయిలో 28వ స్థానంలో ఉన్న తెలంగాణ విద్యారంగం ప్రస్తుతం 18వ స్థానానికి చేరిందని తెలిపారు.
విద్యాశాఖకు మంత్రి లేరని, అందుకే తాను రాజీనామా చేయాలని ప్రతిపక్షాలు డిమాండ్ చేయడంపై సీఎం వ్యంగ్యంగా స్పందించారు. ప్రభుత్వ పాఠశాలల్లో విద్యార్థులకు అల్పాహారం, మధ్యాహ్న భోజనం, సాయంత్రం స్నాక్స్ అందిస్తున్నందుకే రాజీనామా చేయాలా? అని ప్రశ్నించారు.
విద్యారంగ సంస్కరణలపై దృష్టి
ప్రభుత్వ పాఠశాలల్లో నాణ్యమైన విద్యతో పాటు విద్యార్థుల సంక్షేమానికి పెద్దపీట వేస్తున్నామని సీఎం పేర్కొన్నారు. విద్యార్థుల భవిష్యత్తును దృష్టిలో పెట్టుకుని పలు సంస్కరణలు అమలు చేస్తున్నామని, అంతర్జాతీయ స్థాయి విధానాలను అధ్యయనం చేసేందుకు తాను కూడా హార్వర్డ్ విశ్వవిద్యాలయానికి వెళ్లి నేర్చుకున్న విషయాలను రాష్ట్రంలో అమలు చేసేందుకు కృషి చేస్తున్నానని తెలిపారు.
ప్రజలకు ఇచ్చిన హామీలను ఒక్కొక్కటిగా అమలు చేస్తూ రాష్ట్ర అభివృద్ధి, విద్యా వ్యవస్థ బలోపేతంపై ప్రభుత్వం కట్టుబడి పనిచేస్తోందని సీఎం రేవంత్ రెడ్డి స్పష్టం చేశారు.
