ప్రతిపక్షం, జూలై 30: తెలంగాణ విద్యా వ్యవస్థపై బీజేపీ రాష్ట్ర అధ్యక్షుడు రాం చందర్రావు చేసిన విమర్శలకు ముఖ్యమంత్రి రేవంత్రెడ్డి ఘాటుగా స్పందించారు. హైదరాబాద్లో నిర్వహించిన కార్యక్రమంలో మాట్లాడిన ఆయన, రాష్ట్రంలో విద్యారంగం గణనీయంగా మెరుగుపడిందని, అలాంటి పరిస్థితుల్లో తన రాజీనామా కోరడం సమంజసం కాదని అన్నారు.
ఒకప్పుడు దేశంలో విద్యా రంగంలో తెలంగాణ 28వ స్థానంలో ఉండగా, ప్రస్తుతం 18వ స్థానానికి చేరుకుందని సీఎం తెలిపారు. ఇది ప్రభుత్వం చేపట్టిన విద్యా సంస్కరణలు, ప్రభుత్వ పాఠశాలల్లో మౌలిక సదుపాయాల కల్పన, విద్యార్థుల సంక్షేమ కార్యక్రమాల ఫలితమని పేర్కొన్నారు.
రాజీనామా చేయాలని డిమాండ్ చేస్తున్న ప్రతిపక్షాలను ఉద్దేశించి, “పాఠశాలలు నిర్మించినందుకా? విద్యార్థులకు బ్రేక్ఫాస్ట్, మధ్యాహ్న భోజనం, సాయంత్రం స్నాక్స్ అందిస్తున్నందుకా నేను రాజీనామా చేయాలి?” అని ప్రశ్నించారు. విద్యాశాఖకు మంత్రి లేరని విమర్శించే వారు వాస్తవాలను గుర్తించాలని సూచించారు.
తన పాలనపై కూడా సీఎం స్పష్టత ఇచ్చారు. “2034 వరకు నేనే ముఖ్యమంత్రిగా ఉంటాను. అప్పటి వరకు పిల్లల భవిష్యత్తు కోసం అందరం కలిసి పనిచేద్దాం. అదే లక్ష్యంగా ముందుకు సాగుదాం” అని వ్యాఖ్యానించారు. విద్యా వ్యవస్థ అభివృద్ధిపై అధ్యయనం చేసేందుకు తాను హార్వర్డ్ విశ్వవిద్యాలయానికి కూడా వెళ్లానని గుర్తు చేశారు.
ఉద్యోగుల సమస్యలపై కూడా స్పందించిన సీఎం, గత ప్రభుత్వ హయాంలో ప్రతి నెలా ఒకటో తేదీన జీతాలు వచ్చేవా అని ప్రశ్నించారు. తాను మధ్యతరగతి కుటుంబం నుంచి వచ్చిన వ్యక్తినని, ఆ వర్గం ఎదుర్కొనే ఆర్థిక, సామాజిక ఇబ్బందులు తనకు బాగా తెలుసని చెప్పారు.
ప్రభుత్వం విద్య, సంక్షేమం, మధ్యతరగతి కుటుంబాల అభ్యున్నతే లక్ష్యంగా పనిచేస్తోందని, ప్రజలకు ఇచ్చిన హామీలను దశలవారీగా అమలు చేస్తూ రాష్ట్ర అభివృద్ధికి కట్టుబడి ఉన్నామని ముఖ్యమంత్రి రేవంత్రెడ్డి తెలిపారు.
