ప్రతిపక్షం, ఆగస్టు 25: మైగ్రేన్ సమస్య పెద్దల్లోనే కాదు.. చిన్నారుల్లోనూ కనిపిస్తోందని వైద్యులు హెచ్చరిస్తున్నారు. ముఖ్యంగా 12 ఏళ్లలోపు పిల్లల్లో మైగ్రేన్ సమస్య పెరుగుతున్నట్లు చెబుతున్నారు. దాదాపు 10 శాతం మంది పిల్లలు ఈ సమస్యతో బాధపడుతున్నట్లు వైద్యులు పేర్కొంటున్నారు. పిల్లలు తమకు ఎదురవుతున్న ఇబ్బందిని స్పష్టంగా చెప్పలేకపోవడంతో తల్లిదండ్రులు లక్షణాలను గుర్తించడం చాలా ముఖ్యమని సూచిస్తున్నారు.
పిల్లల్లో మైగ్రేన్ వచ్చినప్పుడు సాధారణ తలనొప్పితో పోలిస్తే భిన్నమైన లక్షణాలు కనిపించే అవకాశం ఉంటుంది. తలకు రెండు వైపులా నొప్పి రావడం, వికారం, వాంతులు, కడుపునొప్పి, వెలుతురును భరించలేకపోవడం వంటి సమస్యలు కనిపించవచ్చని వైద్యులు చెబుతున్నారు. కొంతమంది పిల్లలు శబ్దాలను కూడా భరించలేక ఇబ్బందిపడే అవకాశం ఉంటుందని వివరిస్తున్నారు.
పిల్లల్లో మైగ్రేన్ రావడానికి జీవనశైలిలో మార్పులు కూడా కారణమవుతున్నాయని వైద్యులు చెబుతున్నారు. ముఖ్యంగా సరైన నిద్ర లేకపోవడం, శరీరంలో నీరు తగ్గిపోవడం, మానసిక ఒత్తిడి వంటి కారణాలతో తలనొప్పి తీవ్రత పెరిగే అవకాశం ఉందని సూచిస్తున్నారు. సమయానికి నిద్రపోకపోవడం, ఆహారం తీసుకునే విషయంలో నిర్లక్ష్యం చేయడం కూడా సమస్యను మరింత పెంచవచ్చని పేర్కొంటున్నారు.
పిల్లలకు తరచూ తలనొప్పి వస్తోందని చెప్పిన ప్రతిసారీ తల్లిదండ్రులు సొంతంగా మందులు ఇవ్వడం మంచిది కాదని వైద్యులు సూచిస్తున్నారు. ముఖ్యంగా వైద్యుల సలహా లేకుండా నొప్పి నివారణ మందులను పదేపదే ఉపయోగించడం వల్ల సమస్య మరింత క్లిష్టంగా మారే అవకాశం ఉందని హెచ్చరిస్తున్నారు. పిల్లల్లో తరచూ తలనొప్పి, వాంతులు లేదా ఇతర లక్షణాలు కనిపిస్తే వైద్యులను సంప్రదించి కారణాన్ని గుర్తించడం అవసరమని చెబుతున్నారు.
మైగ్రేన్ సమస్యను నియంత్రించడంలో జీవనశైలి కీలక పాత్ర పోషిస్తుందని వైద్యులు వివరిస్తున్నారు. పిల్లలకు ప్రతిరోజూ తగినంత నిద్ర ఉండేలా చూడటం, శారీరక శ్రమకు ప్రాధాన్యం ఇవ్వడం, సమయానికి ఆహారం తీసుకునేలా చూడటం, తగినంత నీరు తాగించడం వంటి అలవాట్లు ఉపయోగపడతాయని సూచిస్తున్నారు.
పిల్లల్లో తలనొప్పిని చిన్న సమస్యగా భావించి నిర్లక్ష్యం చేయకుండా, తరచుగా వస్తున్నట్లయితే వైద్యుల సలహా తీసుకోవాలని నిపుణులు సూచిస్తున్నారు. ముఖ్యంగా తలనొప్పితో పాటు వాంతులు, వెలుతురు చూడలేకపోవడం వంటి లక్షణాలు పదేపదే కనిపిస్తే తల్లిదండ్రులు మరింత అప్రమత్తంగా ఉండాలని చెబుతున్నారు.
