మూసీ ప్రాజెక్టుకు వేగం.. భూసేకరణపై సీఎం రేవంత్ కీలక ఆదేశాలు

ప్రతిపక్షం, ఆగస్టు 25, హైదరాబాద్: మూసీ పునరుజ్జీవ ప్రాజెక్టు పనులను మరింత వేగవంతం చేయాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. ముఖ్యంగా ప్రాజెక్టుకు అవసరమైన భూముల సేకరణ ప్రక్రియను త్వరితగతిన పూర్తి చేసేందుకు స్పష్టమైన కార్యాచరణ రూపొందించాలని సూచించారు. భూసేకరణలో ల్యాండ్ పూలింగ్ విధానంపై స్పష్టమైన మార్గదర్శకాలు సిద్ధం చేయాలని అధికారులను ఆదేశించారు.

మూసీ రివర్‌ఫ్రంట్ అభివృద్ధి పనులపై ముఖ్యమంత్రి ఉన్నతస్థాయి సమావేశంలో సమీక్ష నిర్వహించారు. ప్రాజెక్టు రెండో దశకు సంబంధించిన పనులను ఆలస్యం చేయకుండా వీలైనంత త్వరగా టెండర్లు పిలవాలని అధికారులకు సూచించారు. ప్రాజెక్టు పరిధిలో చేపట్టాల్సిన అభివృద్ధి పనులు, భూసేకరణ, నిధుల సమీకరణ తదితర అంశాలపై సమావేశంలో చర్చించారు.

మూసీ పరివాహక ప్రాంతంలో భూముల సేకరణ సందర్భంగా ఎఫ్‌టీఎల్, బఫర్ జోన్, అసైన్డ్ భూములకు సంబంధించి స్పష్టమైన విధివిధానాలు రూపొందించాలని సీఎం సూచించారు. భవిష్యత్‌లో ఎలాంటి న్యాయపరమైన వివాదాలు తలెత్తకుండా అన్ని అంశాలను నిబంధనలకు అనుగుణంగా పరిశీలించాలని ఆదేశించారు. భూముల సేకరణలో ప్రజలకు ఇబ్బందులు కలగకుండా అవసరమైన చర్యలు తీసుకోవాలని అధికారులకు సూచించారు.

మూసీ రివర్‌ఫ్రంట్ పరిధిలో చేపట్టే వివిధ అభివృద్ధి పనులకు తక్కువ వడ్డీతో రుణాలు అందుబాటులోకి తీసుకురావడంపై మున్సిపల్ కమిషనర్లు దృష్టి పెట్టాలని ముఖ్యమంత్రి చెప్పారు. ప్రాజెక్టులకు అవసరమైన ఆర్థిక వనరుల సమీకరణలో వేగం పెంచాలని సూచించారు. అభివృద్ధి పనులకు సంబంధించి జారీ చేసే బదిలీ అభివృద్ధి హక్కులపై ప్రతి వారం సమీక్ష నిర్వహించాలని అధికారులను ఆదేశించారు.

గండిపేట మంచిరేవుల సమీపంలో నిర్మించనున్న ఓంకారేశ్వరస్వామి ఆలయానికి సంబంధించిన పనులను కూడా సీఎం సమీక్షించారు. ఆలయ నిర్మాణానికి వెంటనే టెండర్లు పిలిచి పనులు ప్రారంభించేలా చర్యలు తీసుకోవాలని ఆదేశించారు. అదే విధంగా కొత్వాల్‌గూడలోని పక్షుల పార్కుకు మరింత ప్రచారం కల్పించి పర్యాటకులను ఆకర్షించేలా చర్యలు చేపట్టాలని సూచించారు.

మూసీ పునరుజ్జీవ ప్రాజెక్టును సమగ్రంగా ముందుకు తీసుకెళ్లేందుకు సంబంధిత శాఖల అధికారులు సమన్వయంతో పనిచేయాలని ముఖ్యమంత్రి స్పష్టం చేశారు. ప్రాజెక్టుకు సంబంధించిన భూసేకరణ, ఆర్థిక వనరులు, అనుమతులు, అభివృద్ధి పనులపై నిరంతర పర్యవేక్షణ ఉండాలని సూచించారు. సమావేశంలో హైదరాబాద్ మహానగర అభివృద్ధి సంస్థ, జీహెచ్‌ఎంసీ, సైబరాబాద్ మున్సిపల్ కార్పొరేషన్, రంగారెడ్డి, మేడ్చల్ జిల్లాల కలెక్టర్లు, మూసీ అభివృద్ధి సంస్థ ఉన్నతాధికారులు పాల్గొన్నారు.