ప్రతిపక్షం, ఆగస్టు 28: శ్రావణ మాసంలో మటన్ కర్రీ వండాలని పట్టుబట్టిన కొడుకును తండ్రి తీవ్రంగా కొట్టి చంపిన విషాద ఘటన మహారాష్ట్రలోని పుణేలో చోటుచేసుకుంది. కుటుంబంలో మతపరమైన ఆచారాలు, మద్యం మత్తు కారణంగా తండ్రీకొడుకుల మధ్య జరిగిన ఘర్షణ చివరకు ప్రాణాలు తీసే స్థాయికి చేరింది. ఈ ఘటన స్థానికంగా తీవ్ర కలకలం రేపింది.
పోలీసులు తెలిపిన వివరాల ప్రకారం.. పుణే ప్రాంతానికి చెందిన మహేశ్ అనే 30 ఏళ్ల వ్యక్తి మద్యానికి బానిసయ్యాడు. ఈ నెల 25వ తేదీ రాత్రి మద్యం సేవించి ఇంటికి వెళ్లిన అతడు.. ఇంట్లో మటన్ కర్రీ వండాలని పట్టుబట్టాడు. అయితే ప్రస్తుతం శ్రావణ మాసం కావడంతో మాంసాహారం వండొద్దని కుటుంబ సభ్యులు చెప్పినట్లు తెలుస్తోంది. దీంతో మహేశ్ ఆగ్రహానికి గురై ఇంట్లో గొడవకు దిగాడు.
ఈ క్రమంలో తండ్రి భగవత్తో మహేశ్కు తీవ్ర వాగ్వాదం జరిగింది. మాటామాటా పెరగడంతో తండ్రీకొడుకుల మధ్య ఘర్షణ చోటుచేసుకుంది. ఆ సమయంలో ఆగ్రహానికి గురైన భగవత్.. మహేశ్పై తీవ్రంగా దాడి చేసినట్లు పోలీసులు తెలిపారు. విచక్షణ కోల్పోయి కొట్టడంతో మహేశ్ తీవ్రంగా గాయపడి అక్కడికక్కడే ప్రాణాలు కోల్పోయాడు.
ఘటన అనంతరం విషయం బయటకు రావడంతో పోలీసులు కేసు నమోదు చేసి దర్యాప్తు చేపట్టారు. మహేశ్ అన్న ఇచ్చిన ఫిర్యాదు ఆధారంగా పోలీసులు తండ్రి భగవత్తో పాటు ఘటనలో సహకరించినట్లు ఆరోపణలు ఎదుర్కొంటున్న తల్లిని కూడా అరెస్టు చేశారు. ఈ ఘటనకు దారితీసిన పరిస్థితులు, కుటుంబ సభ్యుల పాత్రపై పోలీసులు మరింత దర్యాప్తు చేస్తున్నారు.
చిన్న విషయంపై మొదలైన కుటుంబ వివాదం చివరకు ఓ వ్యక్తి ప్రాణాలు కోల్పోయే దారుణ ఘటనగా మారింది. మద్యం మత్తులో విచక్షణ కోల్పోవడం, ఆగ్రహాన్ని అదుపులో పెట్టుకోలేకపోవడం వల్లే ఈ విషాదం చోటుచేసుకున్నట్లు పోలీసులు ప్రాథమికంగా భావిస్తున్నారు.
